Komandu Jerál PNTL orienta ona ekipa investiga kazu tiru mate karau iha Natarbora

DILI, 26 setembru 2022 (TATOLI)-Komandante Jerál Polísia Nasionál Timor-Leste (PNTL), Komisáriu Faustino da Costa, informa nia parte haruka ona ekipa ida atu bá halo investigasaun kazu tiru abitante ida-nian karau iha postu administraivu Natarbora, munisípiu Manatutu foin lalais ne’e.
“Ha’u orienta ona ha’u nia ekipa ida, ohin dezloka ona bá Manatutu para halo investigasaun ba kazu ne’e. Fiar katak, ita sei hetan rezultadu di’ak husi ida ne’e”, Komisáriu Faustino da Costa ba jornalista sira iha Sentru Formasaun Polísia Komoro, segunda ne’e.
Komisáriu PNTL Faustino dehan, nia parte seidauk bele ko’alia buat balun kona-ba asuntu ne’e, tanba sei iha hela prosesu investigasaun. “Ha’u seidauk bele responde, kuandu ekipa ne’e aprezenta rezultadu investigasaun detallu maka ha’u foin ko’alia”.
Tuir Faustino nain ba karau ne’e mós la identifika karreta ne’ebé ema deskoñesidu uza hodi tula karau ne’e, tanba xapa mátrikula karreta nian laiha. “Se sira maka identifika karreta ho xapa mátrikula ne’e ami buka fasil loos, maibé ha’u-nian ekipa investigasaun dezloka ona, entaun ita hein investigasaun”.
Iha fatin hanesan, Komandante PNTL Munisípiu Manatutu, Superintendente João da Costa, informa karau nain presta ona keixa iha eskuadra PNTL Natarbora. “Ha’u fó orientasaun ba Xefe Investigasaun Eskuadra Natarbora para bolu karau nain sira ne’e mai eskuadra para atu fó informasaun, atu ita buka tuir autór ne’ebé estraga komunidade nia animal”, katak nia.
Nia dehan, prosesu identifikasaun ba karau nain sira mós la hatene karreta ne’ebé maka momentu tula karau, tanba karreta refere la ho xápa matrikula.
“Ohin eskuadra PNTL Manatutu submete ona relatóriu mai Komandu PNTL Manatutu, iha bala rua maka sira foti iha fatin akontesimentu, agora daudaun investigadór sira halo ezaminasaun ba bala rua ne’e hodi hatene bala rua ne’e husi ne’ebé”, hatutan tan.
Nia hatutan tan, bainhira liuhosi prosesu investigasaun mak deskobre membru nian envolvimentu, komandante munisipál sei foti desizaun. “Tanba utiliza sasan Estadu nian la tuir lei, klaru sei hetan sansaun tuir lei”.
Kazu ema deskoñesidu ho kilat tiru abitante ida nia karau iha área postu administrativu Natarbora, munisípiu Manatutu, akontese iha sesta (23/9) foin lalais ne’e iha oras 13:00 meudia.
Notísia relevante: Kazu tiru-mate karau iha Dotik sei hein relatóriu ekipa konjunta
Jornalista : Natalino Costa
Editora : Rita Almeida

