iklan

NASIONÁL, INTERNASIONÁL, EDUKASAUN, POLÍTIKA

PN husu adidu edukasaun atende estudante timoroan hetan difikuldade iha Portugál

PN husu adidu edukasaun atende estudante timoroan hetan difikuldade iha Portugál

Prezidente Komisaun G, Deputadu António Verdiál. Imajen Tatoli/Nelson de Sousa.

DILI, 26 setembru 2022 (TATOLI)—Prezidente Komisaun G trata asuntu Edukasaun iha Parlamentu Nasionál, António Verdiál de Sousa, husu adidu edukasaun iha Lisboa-Portugál atu atende estudante timoroan ne’ebé hetan difikuldade atu asesu ba eskola ensinu superiór iha Portugál.

“Husu Ministéiru Ensinu Superiór Siénsia no Kultura (MESSK) servisu hamutuk ho Ministériu Negósiu Estranjeiru no Kooperasaun (MNEK) atu orienta ita-nia adidu edukasaun no embaixadór akreditadu iha Portugál tau matan ho seriedade ba ita-nia oan sira-ne’ebé ba ho inisiativa rasik ka privadu ho sira-nia matenek ne’ebé iha atu asesu ensinu superiór iha Coimbra no universidade seluk iha kapitál Portugál. Tanba, balun hetan difikuldade ba prosesu atu asesu, nune’e sira ba iha ita-nia adidu atu husu tulun maibé ladun iha  atendimentu di’ak hosi adidu sira,” Prezidente Komisaun G ne’e levanta liu hosi reuniaun plenária iha Parlamentu Nasionál, segunda ne’e.

Nia dehan, komisaun simu preokupasaun estudante sira-nian direta hosi mensajen via WhatsApp ba kestaun ne’e.

“Diretamente fó mai ha’u katak iha estudante hamutuk na’in-20 ne’ebé sira-nia naran la rejista fila-fali iha univesidade Coimbra, ho ida-ne’e sira hato’o preokupasaun no sira rasik halo esforsu tomak hakat ba ita-nia embaixada ne’ebé iha Lisboa maibé to’o iha ne’eba sira hatete katak ita-nia adidu ladún tau importánsia ba sira hodi atende,” nia hateten.

Ho nune’e, Deputadu ne’e hola inisiativa telefone ba adidu hodi esklarese katak semana oin sei atende maibé realidade nafatin ho ida-ne’e, nun’e timoroan sira iha Portugál foti nafatin kestaun ne’e to’o ohin loron.

Deputada CNRT, Virgina Ana Belo, hateten mós katak liga ho servisu adidu edukasaun Portugál nian, estudante finalista barak ne’ebé hakarak tama iha universidade sira iha Portugál kestiona tebe-tebes adisu edukasaun ninia servisu, tanba la tau importánsia ba estudante sira ikus mai iha ema na’in 10-resin la konsege ultrapasa ka tama universidade ne’ebé sira hakarak.

“Ninia problema mak ne’e, adidu la fó informasaun klaru ba estudante sira kona-ba dokumentu saida mak loloos presiza. Iha ultima hora hateten ona ba estudante sira bainhira sira lori ba adidu nunka iha fatin, sira ba to’o iha embaixada hein oras ba oras adidu laiha,” nia kestiona.

Ho ida ne’e, Deputada opozisaun ne’e husu atu haree asuntu ida-ne’e ho didi’ak nune’e la sakrifika sidadaun sira-ne’ebé iman-aman lakon osan ho esperansa ida sira ba to’o iha Portugál atu sira bele tama universidade maibé realidade ida-ne’e la akontese.

Hatán ba preokupasaun ne’e, Prezidente Parlamentu Nasionál, Aniceto Longuinhos Lopes, informa katak sesaun plenária ba ohin Governu liuhosi Ministru Asuntu Parlamentár no Komunikasaun Sosiál (MAPKOMS) labele marka prezensa iha reuniaun plenária tanba iha hela atividade servisu iha munisípiu, nune’e ninia tékniku sira mak akompaña iha plenária ida-ne’e rejista hela preokupasaun refere iha tempu tuir mai bele resposta.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!