PR Horta ho Bilionáriu Amerikanu diskute apoiu mídia privada iha Timor-Leste
DILI, 26 setembru 2022 (TATOLI)—Prezidente Repúblika (PR), José Ramos Horta, sábadu (24/09) ne’e, hala’o enkontru ho Billionáriu Amerikanu, ne’ebé hanesan na’in ba fundasaun Open Society Foundation, George Soros, iha Estadu Unidu Amérika.
Tuir Xefe Estadu, na’in ba Open Society Foundation, George Soros hanesan Billionáriu ho idade tinan 90-resin ona, maibé iha kondisaun saúde di’ak, nomos iha influénsia iha mundu.
Prezidente Horta hatutan, delegasaun hosi Open Society Foundation vizita ona Timor, hodi diskute hamutuk programa espesiál ne’ebé fundasaun ne’e atu implementa, liu-liu feto iha negósiu, mídia privadu no demokrasia iha mundu.
“Ha’u sei haree oinsá sira bele apoia mídia iha Timor-Leste, mais ha’u lakohi rona apoiu kona-ba “training”, tanba halo ‘training” tinan lubuk nia laran, ha’u hakarak haree apoiu konkretu ba mídia mak saida. Favór tau osan ruma apoiu ba ekipamentu apoiu ba sede infraestrutura mídia sira-nian buat sira-ne’e. Purtantu, buat barak ha’u sei ko’alia ho sira, nune’e haree oinsá señór George Soros bele apoia Timor-Leste makaas liu,” Xefe Estadu, José Ramos Horta, hateten liu hosi komunikadu imprensa ne’ebé Agéncia TATOLI asesu hosi mídia Palásiu Prezidensiál Nicolau Lobato, segunda ne’e.
Prezidente repúblika ne’e hatetem. Open Society Foundation hakarak apoia hadi’a infraestrutura hosi instituisaun mídia privada sira ne’ebé eziste iha Timor-Leste.
“Klaru apoia ne’ebé ha’u buka ba mídia privadu, tanba mídia Estadu hanesan RTTL, E.P no Agência TATOLI, I.P ne’e governu iha orsamentu, preokupasaun númeru ida (1) ba mídia privada, sira-ne’ebé kleur ona hatudu sira-nia kompromisu mídia privada ne’ebé ho sira-nia rekursu rasik ho difikuldade ne’e inklui mós “online” par apoia mós “online”. Ba mídia privada, ha’u buka atu apoiu hosi Governu ka fundasaun iha rai-li’ur, nuene’e ita-nia jornalista sira bele iha ekipamentu, iha infraestrutura ne’ebé di’akliu, nune’e sira bele dezenvolve,” nia dehan.
Prezidente Horta mós prontu atu buka apoiu ba nasaun seluk hanesan Korea no seluk tan, hodi apoia mídia estatál hanesan RTTL, E.P, maibé kestaun ne’e tenke koordena ho Governu, tanba instituisaun mídia iha papél importante hodi habelar informasaun.
Molok hala’o enkontru ho na’in ba Open Society Foundation, Xefe Estadu hala’o sorumutu uluk ho Geroge Soros nia oan mane Alex Soros hamutuk ho eis Vise Primeiru-Ministru Inglaterra atuál CEO Open Society Foundation hodi ko’alia kona-ba ajenda enkontru ho George Sorus nian.
Jornalista : Nelson de Sousa
Editór : Cancio Ximenes
