OÉ-CUSSE, 26 setembru 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, prevee Orsamentu Jerál Estadu (OJE) 2022 hamutuk $226,017.38 hodi konstrui terminál transporte públiku sira iha eis merkadu Tono, suku Cunha, sub-rejiaun Pante Makasar.
Diretór Rejionál Infraestrutura, Candido dos Reis Amaral, informa, projetu ne’e lokaliza iha suku Cunha, sub-rejiaun Pante Makasar, ho objetivu atu fasilita movimentasaun transporte públiku sira.
“Prosesu konkursu públiku hotu ona, avaliásaun hosi ekipa painél iha ona desizaun finál ba projetu terminál Tono, ita hein katak depois asina kontratu, empreza bele mai aprezenta-aan iha diresaun infraestrutura liuhosi servisu edikasaun tenke halo ona introdusaun servisu,” Candido Amaral, informa ba Agência Tatoli iha Oé-Cusse, segunda ne’e.
Nia dehan, razaun konstrui terminál iha Tono atu fasilita movimentu transporte públiku, liuliu transporte terrestre, tanba daudaun ne’e númeru movimentu aumenta beibeik, entaun autoridade hakarak halo hodi kumpre disiplina.
“Ita haree durante ne’e hamosu problema entre angguna no mikrolete, balu mai hosi foho tama liu sidade, entaun ita kria fatin ne’e bele fahe pasajeiru, angguna to’o de’it terminal ne’e, no mikrolete mak kontinua halo operasaun tama to’o vila,” nia afirma.
Aliende ne’e mós iha ligasaun ho projetu nasionál estrada ligasaun Pante Makasar ba Oésilo, tanba ne’e maka autoridade iha planu integradu hosi sai pakote ida kona-bá jestaun transporte públiku nian.
Entretantu, projetu ne’e sei ezekuta hosi empreza Grand Enklave, Unipesoál Lda, ho valór $226,017.38, osan ne’e Autoridade aloka hosi Orsamentu Jerál Estadu (OJE) 2022.
Durasaun serbisu ba projetu ne’e seidauk termina tanba empreza ho autoridade seidauk halo selebrasaun kontratu.
Jornalista: Abílio Elo Nini
Editór: Evaristo Soares Martins
