COVALIMA, 26 setembru 2022 (TATOLI)–Diretór Munisipál Konservatóriu Rejistu Notariadu Covalima, António Sarmento, informa daudaun ne’e servisu rejistu sivíl munisípiu Covalima prodús Sertidaun Moris (RDTL) no Billete Identidade (BI) provizóriu tanba blanko laiha.
“Agora daudaun blanko Sertidaun Moris (RDTL) no Billete Identidade ne’e laiha, ami provizóriu prodús ho surat tahan HVS. Bainhira iha ona orijinál bainhira sidadaun ne’ebé hetan provizóriu bele lori mai atu imprime fali orijinál,” António Sarmento hato’o ba jornalista iha nia kna’ar fatin, Santa Rosa, segunda ne’e.
Kona-ba sidadaun sira trata BI blanko iha maibé HD-filme mak laiha, nune’e tenke prodús privizóriu uza surat tahan HVS ba sidadaun sira, tanba funsaun HD-Filme ne’e hanesan tinta ho HD-filmemak foin imprime BI bele ho koloridu.
Durante ne’e sidadaun sira iha Covalima hanesan ferik-katuas no joven sira entuziasmu trata dokumentu iha rejistu sivil Covalima tanba joven sira trata dokumentu maiória atu ba estranjeiru no ferik-katuas sira simu subsísiu ba idozu no invalidéz.
Iha fulan rua liubá, diretór halo akizisaun hodi husu blanko sertidaun moris ka RDTL iha dirssaun nasionál hamutuk 1000 maibé agora ramata ona.
Dirasaun rejistu sivil Covalima hato’o ona kestaun ne’e ba iha dirasaun nasionál atu distribui mai maibé estoke blanko iha nasionál mós hotu ona entaun sei loke fali konkursu, nune’e bele haruka blanko sertidaun moris no HD-filme mai iha Covalima nune’e bele imprime BI orijinál.
“Númeru sidadaun trata dokumentu aas, tanba agora 400 ka 500 mak sei iha hela prosesu ami atu imprime,” nia dehan.
Suspende atendeimentu sidadaun trata dokumentu
Entretantu, Diretór Servisu Munisipál Rejistu Notariadu no Servisu Kadastrál, Armindo Monteiro, hateten Servisu Munisipál Konservatóriu Rejistu Notariadu Covalima provizoriu suspende atende sidadaun trata dokumentu, tanba komunidade sira hetan garnada iha resintu Munisipal Konservatóriu Rejistu Notariadu Covalima.
Nia dehan, durante ne’e funsionáriu sira hala’o limpeza la hetan granada maibé iha domingu (25/9/22) komunidade hela besik edifísiu notariadu bainhira atu tama husu sira hetan granada.
“Ami halo limpeza iha resintu edifisiu no konsege halo mós toos maib’e ami la hetan Granada. Maibé horisehik maluk sira iha li’ur ne’e mai tá hudi mak sira hetan granada fali entaun ohin ami la halo atendimentu sidadaun trata dokumentu,” Armindo Monteiro hateten.
Hafoin komunidade hetan Granada, sira informa kedas ba Polisia Nasionál Timor-Leste PNTL munisípiu Covalima tun ba terrenu hodi dada fita no taka avizu hodi hato’o kedas ba administradór hodi orienta ba funsionáriu sira labele halo atendimentu
“Komunidade informa ba PNTL dada kedas fita tanba ami mós tauk atu halo atendimentu ami hato’o kedas ba administradór hatun orientasaun atu ami labele halo atendimentu bainhira hosi nasonal mai foti granada mak foin bele halo atendimentu,” nia haktuir.
Administradór Munisípiu Covalima, Francisco de Andrade, orienta ona funsionáriu sira iha rejistu sivil no notariadu Covalima atu kontinua hala’o servisu, maibé tenke suspende atendimentu ba komunidade tanba bele ameasa ema-nia vida.
“Ohin, ha’u rasik hatun orientasaun ba sira relasiona ho Granada ne’ebé komunidade hetan iha sira-nia edifísiu ho hanoin komunidade balun hakat soe ahi mak nakfera bele fó impaktu ba ema-nia vida. Ita sei moris sei bele trata dokumentu antes akontese di’akliu prevene,” nia dehan.
Jornalista : Celestina Teles
Editór : Cancio Ximenes
