iklan

BAUCAU, HEADLINE, MUNISÍPIU, POLÍTIKA

Restu mortál 475 sei haloot iha jardín eroi Dubuwai Quelicai

Restu mortál 475 sei haloot iha jardín eroi Dubuwai Quelicai

Sekretáriu Jerál CMCLN Baucau, Manuel Alari da Costa Soares. Imajen Tatoli/Natalino Belo.

BAUCAU, 26 setembru 2022 (TATOLI)–Restu mortál hamutuk 475 ne’ebé rekolla iha Timor-Leste sei haloot iha jardín eroi Dubuwai, Suku Laisorulai de Baixo, postu admistrativu Quelicai, munisípiu Baucau.

Sekretária Konsellu Munisipál Kombatente Libertasaun Nasionál (CMCLN, sigla portugés), Manuel da Costa Soares ‘Alari’, esplika restu mortál hirak-ne’e sei haloot iha loron-30 setembru liuhosi serimónia nasionál, preprasaun hahú fulan-agostu hodi harii komisaun organizadora iha autoridade munisipál Baucau.

“Preparasaun serimónia haloot restu mortál ne’e la’o di’ak, suku lima hosi postu Quelicai konsentra ajuda halo preprasaun,” Sekretáriu CMCLN Baucau informa Agênsia Tatoli iha Vila Antiga, segunda ne’e.

Hosi númeru restu mortál hirak-ne’e rekolla hosi komisaun rekollamentu restu mortál jardín eroi Dubuwai liuhosi orientasaun eis Prezidenti Repúblika atúal Primeiru Ministru, Taur Matan Ruak, atu haloot iha jardín refere, ne’ebé konsideradu nu’udar jardín éroi ba dala-rua hafoin jardín éroi Matinaru.

Tuir planu prosesu haloot restu mortál sei partisipa hosi lideransa soberania haat komposta hosi Prezidente Repúblika, Parlamentu Nasionál, Governu no Tribunál Rekursu.

Tuir sekuénsia programa loron-29 setembru sei hahú misa no remata ho halot restu mortál iha loron-30 setembru.

Hosi 475 restu mortál ne’e kuaze ho kargu lideransa durante funu luta kontra okupasaun Indonézia hanesan komandante Suku-Salak hosi postu Laga, munisípiu Baucau no Komandante Fera-Lafaek hosi Munisípiu Lautém. “Ba ita sente urgullu tanba jardín eroi lori besik mai povu tanba bele fasilita nune’e bainhira hakarak vizita la presiza la’o dook,” Alari akresenta.

Tótal restu mortál ne’ebé rekolla hamutuk 507, maibé redús na’in-33 no na’in-ida hosi Lacluta, munisípiu Viqueque, tenke lori fila ba haloot iha moris fatin, nune’e tótal 475 mak sei halot iha jardín pátria Dubuwai.

Dubuwai rasik lokaliza iha Suku Laisorulai de Baixo, sentru entre suku Lelalai no suku Uaibobo, postu Ossu, munisípiu Viqueque ne’ebé durante okupasaun Indonézia sai terseira kompañia nu’udar fatin konsentrasaun forsa armada.

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!