iklan

NASIONÁL, KAPITÁL

Tinan 2023, AMD sei reabilita jardin lima iha kapitál Díli

Tinan 2023, AMD sei reabilita jardin lima iha kapitál Díli

Ambiente Jardin 05 de Maio Colmera, Dili, tersa (27/06). Imajen Tatoli/Francisco Sony.

DILI, 26 setembru 2022 (TATOLI)—Diretór Planu Dezenvolvimentu Integradu Munisipál (PDIM) iha Administrasaun Munisípiu Díli (AMD), Paulo Pinto, informa tuir plánu iha tinan 2023 AMD sei halo reabilitasaun ba jardin lima (5) iha kapitál Díli.

“Preokupasaun ne’ebé ita-nia komunidade sira kestiona kona-ba iluminasaun, fatin tuur no sintina públiku, ida-ne’e ami hosi parte Munisipiu Dili, iha Diresaun Plánu Dezenvolvimentu Integradu Munisipál tau ona ba plánu projetu orsamentu PDIM (Plánu Dezenvolvimentu Integradu Munisipál) nian, iha tinan 2023 ami sei reabilita jardin lima (5) iha munisípiu Dili, hanesan jardin Largo Lecidere, Jardin 05 de Maio, jardin 12 de Novembru iha Igreja Motáel oin, Jardin Colmera Sede Partidu Demokrátiku (PD) nia oin no Jardin GMNTV nia oin. Jardin lima (5) ne’e mak iha ona ami-nia plánu atu halo reabilitasaun ba iluminasaun, fatin tuur, sintina públiku (casa de banho) no moru balun ne’ebé aat, ida-ne’e ami plánu ona,” Paulo Pinto hateten ba jornalista sira iha nia kna’ar fatin, Dili, segunda ne’e.

Reabilitasaun ba Jardin lima ne’e, Dirasaun Planu Dezenvolvimentu Integradu Munisipál foin tau iha planu, maibé seidauk fiksu. Tanba, proposta ne’e sei lori ba debate orsamentu iha Parlamentu Nasionál (PN), kuandu aprova ona hafoin bele implementa.

“Ita bele tau ba planu, maibé kuandu iha Parlamentu Nasionál mak la aprova konserteza ita labele implementa iha tinan 2023,” nia dehan.

Maske nune’e, nia dehan, ho planu reabilitasaun ba jardin lima (5) ne’e, Dirasaun Planu Dezenvolvimentu Integradu Munisipál, prevee orsamentu hamutuk rihun $500.

“Orsamentu rihun $500 ne’e la’ós ba jardin lima (5) de’it, maibé inklui projetu rua (2) mak konstrusaun uma ba Ofisiál Polísia Komunitáriu (OPS) iha suku Hera no Kampo Multifunsaun futeból salaun no voleyból, iha suku Motáel, tanba ida ne’e proposta hosi suku nian,” nia dehan.

Kona-ba planu reabilitasaun ba jardin lima (5) no seluk la reabilita, nia dehan, orsamentu ne’ebé aloka ba reabilitaaun jardin lima (5) ne’e limitadu. Maibé, ba jardin seluk Ministru (Administrasaun Estatál) fó ona orientasaun ba tékniku sira hodi halo levantamentu.

“Agora daudaun tékniku sira halo hela levantamentu ba jardin Cristo Rei hosi Areia Branca tesik ba. Tanba ne’e, sira sei foti dadus no sei prepara dezeñu BOQ, depois fó Ministru, sei Ministru buka osan iha tinan oin mós bele halo. Maibé, ohin temi jardin lima (5), inklui projetu rua (2) ne’e osan husi PDIM nian,” nia dehan.

Jornalista : Nelia Fernandes

Editor       : Cancio Ximenes

iklan
iklan

Leave a Reply

iklan
error: Content is protected !!