Baucau Vila finaliza ona PMOPA faze dahuluk
BAUCAU, 27 setembru 2022 (TATOLI) – Admistrasaun postu administrativu Baucau Vila, munisípiu Baucau finaliza ona implementasaun faze dahuluk Programa Mão de Obra Postu Administrativu (PMOPA).
Administradór postu administrativu Baucau Vila, munisípiu Baucau, Isencinio António da Silva, hateten, faze dahuluk remata iha loron 26 setembru no remata ona rekolla administrasaun inklui prosesa ona pagamentu ba konta bankária kada suku 11 iha Baucau Vila.
“Depois ita sei halo took avaliasaun ruma mak bele identifika falla maibé durante implementasaun kontinua halo tuir indikadór PMOPA nian,” nia informa ba TATOLI iha Vila Nova, tersa ne’e.
PMOPA faze dahuluk iha postu administrativu Baucau vila implementa atividade hamutuk 33 hanesan limpeza jerál, reparasaun estrada eskala kiik ne’ebé kada suku implementa ba grupu tolu, ho totál traballadór hamutuk 660.
Antes ne’e, lansamentu ba programa refere iha loron 31 agostu no hahú implementa iha loron 01 fulan-setembru no implementa durasaun loron-18 ne’ebé kada loron ema-ida $5 no xefe grupu na’in-ida $7.
Tuir planu PMOPA faze daruak, postu Baucau Vila sei hala’o reuniaun konsellu postu hodi identifika atividade tuir kondisaun klima hanesan tempu udan presiza aumenta tán atividade kuda ai-oan tuir estrada publiku no limpeza barranjen.
“Fulan-outubru sei kontinua PMOPA faze daruak tanba tenke finaliza iha fulan-dezembru,” Isencinio da Silva akresenta.
Programa refere implementa ba faze rua hanesan, faze dahuluk hamutuk orsamentu $ 6.870,665 no faze daruak $6.870,665. Hosi tótal orsamentu $13.741,33 ne’e aloka ba operasionál 5% no 95% ba kustu investimentu.
Governu aprova PMOPA aloka fundu hamutuk millaun $ 7,2, liuhosi transferénsia ba kada konta bankária munisípiu tuir dekretu lei númeru 3/2016, hodi implementa sub-atividade hamutuk rihun 35 iha territóriu nasionál no fó serbisu diária ba traballadór informál purvolta rihun 67.
Jornalista : Natalino Belo
Editór : Evaristo Soares Martins
