DILI, 27 setembru 2022 (TATOLI)—Deputada hosi bankada CNRT, Carmelita Caetano Moniz, lamenta ho desizaun Konsellu Administrasaun Parlamentu Nasionál (PN) hasai tabela salariál ba asesór internasionál iha PN.
“Ha’u lamenta no la konkorda uitoan ho desizaun Konsellu Administrasaun ita-nian ne’ebé sai ona iha jornál repúblika liuhosi desizaun númeru 63 kona-ba tabela salariál asesór Parlamentu Nasionál diferensa demaziadu. Diferensa ne’ebé tau iha ne’eba ba asesór nasionál ne’ebé grau akadémiku doutoramentu iha esperiénsia tinan mais 15 nia saláriu mínimu $6500 no másimu $8000 no ba asesór internasionál grau akadémiku doutoramentu iha esperiénsia mais 18 nia saláriu mínimu $17.500 no másimu 20000,” Deputada Carmelita hato’o liuhosi reuniaun plenária iha PN, tersa ne’e.
Tuir nia, iha Parlamentu Nasionál ne’e atu halo saida iha ne’e ita hotu-hotu Deputadu no membru komisaun haree.
“Ita presiza asesór internasionál mai tulun ita mais dalabarak ita-na’in mesak servisu mós ita buka tun no buka sae la’ós Parlamentu Nasionál iha nasaun seluk. Ezemplu Estadu Unidu no rai seluk ema halo hotu tiha mai, ita ne’e hein ko’alia de’it iha plenária mais ita-nian lae, liuliu Komisaun A ita tenke buka halo rasik asesór sira ajuda ita língua ne’e de’it,” nia hateten.
Nia hatutan, tabela salariál ne’e asesór nasionál másimu $8000 maibé estranjeiru másimu to’o 20000, ida-ne’e tau duni ba iha Orsamentu Jerál Estadu 2023 entaun nia parte sei halo proposta atu ko’a.
“Ne’e labele duni no la tama iha lójika tanba diferensa ne’e boot tebe-tebes, nune’e presiza tetu hikas polítika sira-ne’e no se ita presiza tebes duni,” nia hateten.
Tuir nia, osan Estadu atu fó ba asesór sira-ne’e iha orsamentu 2022 rihun $100 ba leten atu halo de’it pagamentu ba asesór sira.
Hatán ba ida-ne’e, Prezidente Parlamentu Nasionál, Aniceto Longuinhos Guterres Lopes, hateten Konsellu Administrasaun la halo tabela foun ida maibé hanesan ajusta de’it ho tabela salariál asesór nian hosi Governu nian ne’ebé tuir lei ka dekretu-lei mak regula iha ne’eba.
“Tanbasá mak tenke adapta no ajusta ho Governu ninian tanba iha esperiénsia iha asesór potensiál barak depois sira inklina liu hakarak ba servisu iha Governu tanba iha ne’eba oferese saláriu di’akliu tantu nasionál no internasionál,” nia esklarese.
Nune’e, situasaun sira-ne’e la favorese PN atu hadi’a kualidade servisu enkuantu Governu ninia rekursu barak liu oinsa mak PN hola inisiativa haree rekursu umanu haree hosi ninia klase ema potensiál primeiru hakarak ba Governu maibé klase segundu mai kraik mak mai iha PN tanba diferénsa saláriu.
Purtantu ajusta de’it tuir lei ba diskripansia ne’e, nune’e bele hadi’a bainhira hahú hadi’a hosi lei ne’ebé estabelese tabela salariál tantu ba Governu no PN so altera iha ne’eba.
“Konkorda katak iha diskripansia ne’e boot tanba la halo tabela foun apenas ajusta de’it ho Governu ninian, entaun se ita hakarak diminui Gap ka diskripansia ida-ne’e só altera kedas hosi dekretu-lei ka dekretu Governu ne’ebé estabelese kona-ba tabela salariál asesór nian,” nia hateten.
Se komesa tinan oin mak halo karik, ne’e apenas desizaun ida-ne’ebé Konsellu Administrasaun hasai seidauk iha asesór ida-ne’ebé selu tuir ida-ne’e, pelumenus to’o agora ne’e asesór PN nian ka agora Governu nian sira goza tiha ona benefísiu ida-ne’e karik.
Ministru MAPKOMS, Francisco Jerónimo, hateten saláriu asesór loos duni iha dekretu-lei ne’ebé Governu anteriór halo hela iha ne’eba ko’alia kontratu termu sertu ba asesór nasionál no internsionál ho saláriu mínimu no másimu, depende ba ninia grau edukasaun, esperiénsia no méritu.
“Ne’ebé hotu-hotu tuir lei ne’ebé mak iha hela no ami mós la inventa buat foun maibé ida ne’ebé mak iha mak la’o,” nia hateten.
Jornalista : Nelson de Sousa
Editór : Cancio Ximenes
