Deputadu FRETILIN rekomenda Governu kondekora artista sira iha tempu rezisténsia

DILI, 27 setembru 2022 (TATOLI)—Deputadu hosi bankada FRETILIN, Favião de Oliveira, rekomenda ba Governu atu konsidera halo mós kondekorasaun ba artista timoroan sira iha tempu rezisténsia nia laran nu’udar kompozitór no mós kanta múzika rezisténsia.
Notísia Relevante: Oras To’o Ona, atu ita hili…

“Ita haree katak tina-tinan Estadu fó kondekorasaun ba iha ita nia asswa’in FALINTIL sira no mós ba ativista sira-ne’ebé hosi estranjeiru no rai-laran. Ha’u hakarak rekomenda, karik bele fó mós kondekorasaun ba ita-nia artista sira-ne’ebé iha tempu rezisténsia nia laran nu’udar kompozitór no mós kanta músika rezisténsia sira,’’ Deputadu Favião hato’o liuhosi reuniaun plenária iha Parlamentu Nasionál, tersa ne’e.
La’os ida-ne’e de’it maibé iha múzika “Hakotu Ba/Orsa To’o Ona” ne’ebé fó motivasaun ba populasaun sira hakat hakbesik sentru votasaun hodi ezerse sira-nia direitu votu iha 30 agostu 1999, ne’ebé hosi grupu artista hosi Lahane sira, ida-ne’e motiva tebes populasaun iha momentu ne’eba atu ba vota, mezmu sira hetan ameasa, tortura hosi militár Indonézia sira.
“Hanoin katak ita presiza fó kondekorasaun ruma atu bele valoriza sira-nia talentu ne’ebé iha momentu ne’eba, motiva tebes ba ita-nia populasaun atu ba vota iha 30 agostu. Tan ne’e, husu Governu atu bele toma konsiderasaun,” nia rekomenda.
Liu hosi reuniaun plenária, reprezenta Governu liuhosi Ministru Asuntu Parlamentár no Komunikasaun Sosiál (MAPKOMS), Francisco Jerónimo, rejista hela rekomendasaun hosi deputadu bankada Governu ne’e nian.
Jornalista : Nelson de Sousa
Editór : Cancio Ximenes

