iklan

NASIONÁL, KAPITÁL

DNTT sei orienta tékniku observa semáforu ne’ebé avaria iha Colmera

DNTT sei orienta tékniku observa semáforu ne’ebé avaria iha Colmera

Semaforu. Foto/Google.

DILI, 27 setembru 2022 (TATOLI)—Diretór Dirasaun Nasionál Transporte no Terrestre (DNTT), António da Costa, informa nia parte sei orienta tékniku observa semáforu ne’ebé avaria iha Colmera, tanba semáforu iha fatin ne’ebá antes ne’e normáliza ona.

“Semáforu iha jardin 05 de Maio (Colmera) mate kle’ur duni, maibé ha’u esforsu ko’alia ho ha’u-nia tékniku sira no ajuda hosi ita-nia alin estudante polítekniku ikus mai ami bele hadi’a. Maibé agora daudaun prosesu sei la’o hela, ne’ebé keta iha fallansu ruma, orsida ha’u sei haruka ami-nia tékniku sira ba observa iha ne’ebá,” António da Costa hateten ba Agência Tatoli iha nia kna’ar fatin, Dili, tersa ne’e.

Tuir nia, semáforu ne’ebé daudaun avaria ne’e responsável kompañia tanba momentu iha 20 maiu kuandu Prezidente Repúblika atu simu pose, semáforu iha Dili laran avaria ka mate hotu.

“Iha momentu ne’e, Ministru Transporte no Komunikasaun (MTK), José Agostinho da Silva, bolu ha’u ho Diretór Jerál (DJ) na’in-rua atu buka oinsá rezolve semáforu sira-ne’e. Entaun, momentu ne’e Ministru bolu ha’u atu bolu kompañia ruma hodi halo manutensaun urjente ba sinál semáforu Dili laran no akizisaun direta, komu buat ne’e agora seidauk la’o 100% tanba kompañia seidauk asina kontratu,” nia dehan.

Tanba ne’e, kompañia loro-loron mai sisi hela maibé iha tarde ka sedu kompañia sira-nia kontratu sei asina.

“Maibé iha 21 liubá, ministru fó hatene ha’u katak kontratu ne’e asina ona tanba ne’e ba oin ha’u sei ko’alia ho sira (kompañia) atu hadi’a. Hosi ne’e, kompañia mós promote mai ha’u katak, bainhira kuandu sira asina kontratu, sira sei halo manutensaun ba semáforu ne’ebé la lakan ne’e sira sei halo lakan hotu, inklui ai-riin mós sira sei pinta foun hotu. Ida-ne’e konforme komprómisiu hosi kompañia nian,” nia esplika.

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!