iklan

EKONOMIA, COVALIMA

Joven sira iha Maudemo ho inisiativa rasik reabilita merkadu Tilomar

Joven sira iha Maudemo ho inisiativa rasik reabilita merkadu Tilomar

Joven suku Maudemo reabilita merkadu iha aldeia Caicoli, suku Maudemo, postu administrative Tilomar, munisípiu Covalima. Imajen Tatoli /Celestina Teles.

COVALIMA, 27 setembru 2022 (TATOLI)–Joven sira iha suku Maudemo ho inisitiva rasik reabilita merkadu ne’ebé lokaliza iha aldea Caicoli, postu administrativu Tilomar, munisípiu Covalima tanba durante ne’e merkadu refere abandona hela.

“Ami joven sira hosi suku Maudemo tau hanoin hamutuk hodi reabilita merkadu iha aldeia, Caicoli, suku Maudemo, postu Tilomar tanba durante ne’e ita haree merkadu ne’e abandona hela. Entaun ami joven sira hola inisiativa hodi reabilita merkadu,” Reprezentante Joven iha Tilomar, Charles Dao Jawa, hateten ba jornalista sira, iha merkadu Salele, suku Maudemo, tersa ne’e.

Razaun reabilita merkadu refere durante merkadu ne’e abandona hela, entaun joven sira hola inisiativa hodi tau ideia hamutuk hodi reabilita ne’ebe hanesan meiu ida atu halo jestaun ba merkadu hodi uza.

Rehabilita merkadu ne’e fundu mai hosi joven sira rasik, hosi postu administrativu Tilomar tomak mak halo kontribuisaun hamutuk $1000 hodi sosa materiál konstrusaun ne’ebé uza hodi reabilita merkadu refere.

“Haree ba fundu ne’ebé ami iha uza hodi halo reabilitasaun merkadu ne’e mai hosi joven sira rasik, hanesan lori sosa ssementi no seluk tan tuir nesesidade materiál konstrusaun ne’ebé mak presiza atu uza ba reabilitasaun,” nia dehan.

Hafoin reabilita merkadu ne’e joven sira sei rekolla naran vendedór sira-ne’ebé atu faan sasán iha merkadu Salele no joven sira sei hamoos merkadu ne’e iha loron tersa, nune’e kuarta  negosiante sira hodi halo negósiu iha merkadu refere.

Tuir planu, kada tersa ekipa sei hamoos prepara ba loron kuarta ne’ebé loron merkadu iha postu Tilomar no sei prepara billete maibé sei identifika naran vendedór sira mak uza merkadu hodi haree mós kuantidade sasán ne’ebé sira iha.

Maibé, atu distribui billete joven sei hala’o enkontru ho negosiante sira hodi deside presu billete tanba agora seidauk deside presu billete.

“Ami distribui billete bazea kuantidade sasán ne’ebé sira faan maibé agora seidauk deside presu billete hira ami sei realiza enkontru hodi deside presu billete ida-ne’e,” nia hateten.

Jornalista   : Celestina Teles

Editór         : Cancio Ximenes

iklan
iklan

Leave a Reply

iklan
error: Content is protected !!