iklan

INTERNASIONÁL, DILI, POLÍTIKA

Komisaun Konstrusaun ba Pás ONU realiza sesaun espesiál dedika ba Timor-Leste

Komisaun Konstrusaun ba Pás ONU realiza sesaun espesiál dedika ba Timor-Leste

Organizasaun Nasaun Unida (ONU) liuhosi Komisaun Konstrusaun ba Pás (Peace Building Comision), realiza sesaun enkontru ida-ne’ebé dedika espesiál ba povu no nasaun Timor-Leste. Imajen/Mídia PR.

DILI, 27 setembru 2022 (TATOLI)—Organizasaun Nasaun Unida (ONU) liuhosi Komisaun Konstrusaun ba Pás (Peace Building Comision), realiza sesaun enkontru ida-ne’ebé dedika espesiál ba povu no nasaun Timor-Leste.

Eventu ne’e realiza iha salaun enkontru ONU, ne’ebé marka prezensa direta hosi Sekretáriu Jerál Organizasaun Nasaun Unida, António Guterres no hosi Timor-Leste reprezenta hosi Prezidente Repúblika, José Ramos Horta no Líder Nasionál no atuál Xefe Eminénsia g7+, Kay Rala Xanana Gusmão.

“Peace Building Comision (Komisaun Konstrusaun ba Paz), halo sesaun ida espesiál dedikadu ba Timor-Leste, ha’u rasik partisipa hanesan Xefe Estadu maibé maun Bo’ot Xanana mós partisipa hanesan Eís-Xefe Estadu, nu’udár mós fígura nasionál no mundiál, iha komisaun ne’e nia kna’ar mak akompaña no apoiu prosesu konstrusaun ba pás iha mundu. Ne’ebé ema husu esperiénsia di’ak hosi Timor, iha momentu ne’e ha’u-nia intervensaun ha’u hateten, prosesu ba rezolusaun konflitu iha ne’ebé de’it atu hetan solusaun ba konflitu, kritériu númeru ida mak lideransa,” Prezidente Repúblika (PR), José Ramos Horta, hateten liu hosi komunikadu imprensa ne’ebé Agéncia TATOLI asesu hosi mídia Palásiu Prezidensiál, tersa ne’e.

Xefe Estadu fundamenta lideransa di’ak iha instituisaun privadu no públiku, bele evita no rezolve konflitu, hanesan saida mak líder nasionál Xanana Gusmão halo iha funu, promove rekonsiliasaun, hodi hako’ak malu no promove dame.

“Prossesu rekonsilisaun nasionál, hanesan modelu di’ák tebes, tambá konflitu iha Timor-Leste iha tinan 24 nia laran loké kanek boot iha ema rihun ba rihun nia fuan, mentalidade no sentimentu tanba violénsia, maibé violénsia ne’e la’ós mai de’it husi inimigu maibé ita Timor-oan rasik,” Horta hateten.

Xefe Estadu husu atu lalika buka hodi julga maibé buka rekonsilia ho sentimentu hosi fuan.

“Ita lalika buka halo julgamentu ba malu, atu hahú julgamentu hahú sé loos. Ita labele halo julgamentu ne’e ba grupu ida, labele ba kee de’it problema 1999 nian, hakarak kee hahú kedas iha 1975. Ha’u-nia intervensaun ha’u hateten, atu taka kanek hahú ho rekonsilisaun, ne’e la’ós mai hosi lei ruma de’it, rekonsilisaun ne’e tenke mai hosi idak-idak nia fuan no sentiment,” nai dehan.

Xefe Estadu mós apresia líderansa Xanana Gusmão nian ne’ebé mós hetan apoiu hosi lideransa nasionál sira seluk, inklui partidu polítiku no povu Timor hodi kria dame, taka kanek hosi pasadu no rekonsilia malu.

Ba Xefe Estadu, prosesu rekonsilisaun nasionál ne’ebé di’ák entre Timor-Leste no Indonézia, reprezenta matenek no vizaun hosi Prezidente Repúblika Gus Dur (Abdurrahman Wahid) to’o Susilo Bambang Yudhoyono.

Kona ba rezolusaun konflitu, Repúblika defende nesesidade atu iha líder vizionáriu, iha autoriedade, karízma no kreabilidade no hetan apoiu hosi povu tomak.

Entretantu, Governu Timor-Leste no Indonézia durante ne’e hari’i ona Komisaun Verdade no Amizade (CVA, siglá portugés) hodi hakerek hotu istoria moruk iha pasadu entre rai rua nian nu’udar istória osan mean ba jerasaun sira hodi aprende no konta nafatin.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!