COVALIMA, 27 setembru 2022 (TATOLI)–Administradór Munisípiu Covalima, Francisco de Andrade informa, kompañia Joel Amor Unipesoál, Lda, sei konstrui irrigasaun Beigui iha suku Lepo, postu administrativu Zumalai, munisipiu Covalima.
“Ita fó ba kompañia manan-na’in segundu hanesan kompañia Joel Amor mak sei konstrui irrigasaun Beigui iha postu administrativu Zumalai, munisípiu Covalima tanba prosesu tomak ha’u entrega ona ba iha aprovizionamentu hein de’it ona aprovizionamentu fó sai,” Francisco de Andrade hateten ba Agência Tatoli, iha nia kna’ar fatin, Sukaer Laran, tersa ne’e.
Razaun autoridade Covalima fó ba komapañia manan-na’in segunda atu konstrui irrigasaun Beigui tanba kompañia manan-na’in dahuluk sei kaer projetu no bazea ba ekipa sira halo observasaun kompañia ne’e laiha ekipamentu sufisiente atu konstrui irrigasuan Beigui, entaun entrega ba kompañia Joel Amor Unipesoál, Lda,” nia dehan.
Ho nune’e, nia dehan, prosesu hotu entrega ona ba aprovizionamentu hein de’it ona hosi aprovizionamentu bolu kompañia, nune’e irrigasaun Beigui sei konstrui iha inisiu fulan-outubru tinan ne’e.
Bazea ba kontratu konstrusaun irrigasaun sira-ne’e ho nia duranrasaun tempu durante fulan tolu nia laran ne’e kompañia tenke finaliza ona.
Antes ne’e, Diretór Programa Dezenvolvimentu Integradu Munisipal (PDIM), Afonso Nogueira Nahak esplika, projetu konstrusaun irrigasaun Beigui ho naruk kilometru ida ka metru 1000 ho nia montante orsamentu hamutuk $89.406
Projetu konstrusaun irrigasaun Beigui ne’e la uza orsamentu hosi rúbriku kapitál dezenvolvimentu tinan fiskal 2022, maibé uza orsamentu restu projetu konstrusaun edifísiu postu administrativu Maucatar no rezidénsia Administradór Munisípiu Covalima nian.
Jornalista : Celestina Teles
Editór : Cancio Ximenes
