iklan

DILI, POLÍTIKA

Meza PN baixa proposta-lei Finansa Munisipál ba komisaun C

Meza PN baixa proposta-lei Finansa Munisipál ba komisaun C

Prezidente Parlamentu Nasionál, Aniceto Longuinhos Guterres Lopez.

DILI, 27 setembru 2022 (TATOLI)—Parlamentu Nasionál (PN) liuhosi reuniaun plenária anúnsiu admisaun no baixa  ba komisaun C trata asuntu Finansa Públika, ba proposta lei númeru 44/V (4a)-Lei Finansa Munisipál.

“Anúnsia no baixa proposta lei ne’e ba komisaun C atu halo apresiasaun inisiál, relatóriu no paresér iha prazu loron 45,” Prezidente Parlamentu Nasionál, Aniceto Longuinhos Guterres Lopes, hateten iha sala plenária PN, tersa ne’e.

Nia hateten, kona-ba inisiativa ida-ne’e husu komisaun atu lee no pondera didi’ak nota téknika ne’ebé DIPLN hasai tanba iha kestaun barak mak tenke konsidera iha ne’eba.

“Exemplu iha buat barak proposta-lei ne’e kontraria ho Lei Enkuadramentu Orsamentu (LEO) ne’ebé ita rasik (PN) mak aprova mai hosi komisaun C, parese LEO ne’e uluk Ministéiru Finansa mak prepara no agora ida Finansa Munisípál parese ministéiru seluk mak prepara maibé adota iha Konsellu Ministru (KM). Tanba ne’e meza aviza hela ba komisaun atu haree didi’ak se bele armoniza hotu ho lei existente,” nia dehan.

Enkuantu, kona-ba artigu hira no ninia substánsia hosi proposta lei ne’e seidauk bele fó sai tanba komisaun espesializada sei halo apresiasaun uluk.

Antes ne’e, iha loron 22 juñu 2022, Governu liuhosi reuniaun Konsellu Ministru (KM) aprova projetu proposta-lei ne’ebé aprezenta hosi Ministru Administrasaun Estatál (MAE), Miguel Pereira de Carvalho, ba kriasaun Lei Finansa Munisipál nian.

“Lei ida-ne’e estabelese rejime enkuadramentu orsamentál, finanseiru no kontabilidade públika ba munisípiu sira,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu, iha Palásiu Governu.

Aprovasaun ne’e hodi konsidera autonomia finanseira munisípiu, ne’ebé estabelese hosi lei númeru 23/2021, loron 11 novembru, Lei Podér Lokál no Desentralizasaun Administrativa, hodi regula orsamentu munisipál sira.

Antes ne’e, iha loron 21 setembru 2021, Parlamentu Nasionál aprova projetu-lei Eleitorál Munisipál, Poder Lokál, no desentralizasaun Administrativa.

Projetu-lei Podér Lokál no Desentralizasaun Administrativa ne’e konstitui ho pesoa koletiva iha territóriu nasionál ba órgaun reprezentativu sira-ne’ebé define organizasaun, kompeténsia, funsionamentu no kompozisaun define iha lei.

Lejizlasaun ne’e atu hakbesik servisu públiku sira hosi Estadu ba kraik ka atribui kompeténsia tomak ba munisípiu sira halo planu, programa no orsamentu rasik.

Projetu-lei Desentralizasaun Administrativa ne’e previstu atu Governu Sentrál halo transferénsia kompeténsia ka fó podér ba munisípiu sira no atribui kompeténsia balun ne’ebé durante ne’e seidauk fó ba Governu munisipál.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!