iklan

INTERNASIONÁL, DILI, HEADLINE, POLÍTIKA

PR Horta hakarak reforsa kooperasaun ho nasaun sira iha Europa

PR Horta hakarak reforsa kooperasaun ho nasaun sira iha Europa

Prezidente Repúblika, José Ramos Horta, hasoru malu ho Sub-Sekretáriu Estadu Finlándia, Kai Saur, iha Nova Iorke. Imajen/Mídia PR.

DILI, 27 setembru 2022 (TATOLI)—Prezidente Repúblika (PR), José Ramos Horta, hasoru malu ho Sub-Sekretáriu Estadu Finlándia, Kai Saur, iha Nova Iorke, no Xefe Estadu haree possibilidade atu vizita ba Finlandia iha tinan 2023 hodi reforsa kooperasaun no promete hakarak reforsa kooperasaun ho nasaun sira iha Europa.

“Ha’u koñese nia (Kai Saur) di’ak, ha’u-nia amigu, kolega tinan lubuk ida laran. Ami na’in-rua sempre kontaktu malu kada semana. Nia uluk Embaixadór ba Indonézia no mós ba Timor-Leste, Finlandia rai ida ho prestíjiu rai ki’ik mais membru NATO, fronteira ho Rússia, entaun sira preokupadu loos situasaun Ukránia, mais la haluha Timor-Leste. Ami ko’alia posibilidade tinan foun ne’e mai 2023, ha’u sei ba vizita Finlandia, tanba ha’u hakarak ba Finlandia, Norwegia, ba Inglaterra, Alemaña tinan foun ne’e mai,” Xefe Estadu ne’e hateten liuhosi komunikadu imprensa ne’ebé Agéncia TATOLI asesu hosi mídia Palásiu Prezidensiál, tersa ne’e.

Tuir PR relasaun externa entre Timor-Leste no nasaun balun iha Europa hakiduk iha tinan sira ikus ne’e.

“Tanba tinan sira-nia laran, ita-nia relasaun ho rai barak kuaze monu tun ba zero. Uluk relasaun makaas ho Norwegia agora zero, uluk relasaun di’ak ho Finlandia agora zero ho Alemaña mós bele hatete zero. Ne’eduni ho rai sira-ne’e ha’u halo kontaktu ona prontu atu 2023 vizita,” nia hateten.

Relasiona ho relasaun bilaterál ho Alemaña, Prezidente Repúblika hakarak explora oportunidade empregu ba joven sira no prosesu ne’e hahú ho vizita delegasaun Parlamentu Alemaña iha loron 24 fulan outubru.

“Ho sira (Alemaña) ha’u hahú ona, koko haree oinsá Timoroan bele ba servisu iha Alemaña, mais liuhosi prosesu ofisiál Governu ho Governu. Ha’u lakohi ema privadu mete iha laran, deputadu ne’e Federal boot iha Alemaña, nia mak Prezidente Komisaun Bundestag Parlamentu Alemaña nian, mai ko’alia ho ha’u para haree relasaun bilaterál no haree mós programa traballadór Timorense atu ba Alemaña. Ne’e ha’u sei ensiste tenke liuhosi Governu hosi SEFOPE ho Governu Alemaña, ha’u buka de’it halo diplomasia loke odamatan,” Xefe Estadu hateten.

Timor-Leste hanesan nasaun foun, ne’ebé aposta makaas ba kooperasaun externa ho nasaun hotu, hodi haforsa dezenvolvimentu iha seitór vital hotu.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!