iklan

HEADLINE, OÉ-CUSSE (RAEOA), POLÍTIKA

Sensu populasaun iha Oé-Cusse atinje ona 88%

Sensu populasaun iha Oé-Cusse atinje ona 88%

Ekipa sensu populasaun rekolla hela dadus ba komunidade sira iha RAEOA. Imajen espesiál.

OÉ-CUSSE, 27 setembru 2022 (TATOLI) – Koordenadora Rejiaun 5, Francisca da Costa Xavier Silva, hatete rezultadu provizóriu kona-bá dadus sensu populasaun no uma-kain iha Rejiaun Administrativa Espesiál Oé-Cusse Ambeno (RAEOA), hamutuk 18.136 ekivalente ho 88% maka rejista ona.

“Dadus provizóriu ne’ebé maka hala’o iha Oé-Cusse hamutuk 18.136, ida-ne’e rezultadu rekolla dadus hahú iha 05 setembru to’o 23 semana kotuk, ita konta ba porsentu 88% ona maka tama ona iha server,” Francisca da Costa Xavier Silva, hatete iha Oé-Cusse, tersa ne’e.

Nia informa, iha Oé-Cusse iha sub-rejiauan haat no suku 18, kuaze rekolla ona maibé iha balu maka seidauk rekolla kada suku númeru 100 mak seidauk rekolla, maibé komesa semana ne’e nia laran sei kobre hotu área ne’ebé izoladu.

Hanesan iha sub-rejiaun Nítibe iha suku rua konklui ona maibé suku tolu maka seidauk kompleta, iha sub-rejiaun Oésilo nian suku rua hotu ona Usitasa’e ho Usitaqueno, hela suku Bobometo maka seidauk kompleta.

Nune’e mós iha sub-rejiaun Pante Makasar seidauk kompleta, daudaun ne’e prosesu rekolla dadus sei la’o hela, ba fali sub-rejiaun Pássabe mós seidauk kompleta, ne’ebé sei iha tempu atu kontinua rekolla tanba kalendáriu iha Oé-Cusse sei rekolla to’o 05 outubru.

Antes ne’e Diresaun Jerál Estatístika rekruta staf atu atende sensu populasaun hamutuk 169, komposta hosi enumeradór na’in-129 no supervizór na’in-40, daudaun ne’e kontinua hala’o hela serbisu iha baze.

Tuir nia, bainhira rekolla ona dadus iha baze, dadus hotu-hotu submete hotu ba nasionál, depois hosi nasionál haree tiha, karik iha fallansu sei koordena fali mai munisípiu, atu informa fali ba supervizór sira iha baze atu kompleta dadus.

Nune’e hanesan koordenadóra rejiaun 5 iha RAEOA, apela nafatin ba sidadaun hotu iha baze, liuliu sira-ne’ebé seidauk fornese dadus loloos ba enumeradór sira, bele koopera hodi kontribui nune’e dadus ne’ebé rekolla hetan susesu hodi kontribui dezenvolvimentu nasaun nian.

Daudaun ne’e nia parte seidauk anunsia dadus ne’ebé sai aas liu iha rejiaun ne’e, tanba prosesu rekolla dadus sei kontinua la’o hela iha baze.

Enkuantu, dokumentu sensu populasaun 2015 totál populasaun iha Timor-Leste hamutuk 1.167.242, komposta hosi mane 588.561 no feto 578.681.

Nune’e mós bazea ba dokumentu sensu populasaun 2010 rejista populasaun iha territóriu nasionál 1.066.408, komposta hosi mane 544.198 no feto 522.242, ne’ebé hatudu katak durante tinan lima nian laran populasaun aumenta 100.833.

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!