Governu Japaun kontinua apoia Timor-Leste iha setór edukasaun
BAUCAU, 28 setembru 2022 (TATOLI) – Governu Japaun liuhosi embaixada iha Timor-Leste sei kontinua apoia Timor-Leste iha setór edukasaun.
Embaixadór Japaun iha Timor-Leste, Kinefuchi Masami, hateten, governu Japaun no Timor-Leste ofisializa relasaun bilaterál iha tinan-2002, nune’e durante tinan-20 governu Japaun rasik ajuda ona formasaun profisionál ba dosente no estudante sira liuhosi programa interkámbiu.
“Ha’u hakarak deklara ami-nia kompromisu atu kontinua apoia harii nasaun doben ida-ne’e ho espíritu lasu amizade no solidariedade,” Embaixadór Japaun iha Timor-Leste hateten iha Fatumaca, kuarta ne’e.
Governu Japaun sei kontinua esforsu kriasaun eskola post-graduasaun hamutuk unidade neen no oferese bolsa estudu ba estudante sira+ne’ebé to’o ohin loron hamutuk na’in-100 resin mak gradudu ona iha nível doutoramentu, mestradu no baixarelatu bainhira estudu iha Japaun.
Diplomata Japoneza ne’e, akresenta, governu Japaun mos koordena ona ho governu Timor-Leste, atu haruka traballadór timoroan ba serbisu iha Japaun, liuliu iha área akademia ne’ebé kada tinan sempre simu traballadór hosi nasaun seluk hamutuk rihun 30+resin nune’e sei hetan abilidade foun bainhira servisu iha Japaun nune’e bainhira fila sei kontribui ba dezenvolvimentu nasaun.
“Se karik ita-boot sira iha diploma baixarelatu ne’ebé hakarak serbisu iha kompañia Japaun, ami kontente tebes hodi oferese vistu serbisu ka bele hetan vistu permanente hafoin tinan-lima serbisu iha Japaun,” Kinefuchi Masami argumenta.
Misaun inportante balun hosi governu Japaun, foka liubá apoia dezenvolvementu iha área edukasaun tanba konsidera setór refere sai determinante Timor-Leste iha futuru hanesan fó bolsa estudu no hadi’a infraestrutura.
Jornalista : Natalino Belo
Editór : Evaristo Soares Martins
