COVALIMA, 29 setembru 2022 (TATOLI)—Diretór Jestaun Merkadu no Turizmu Covalima (JMTC), Vitorino do Carmo, husu ba Administradór Munisípiu Covalima Francisco de Andrade presiza kapasita ofisiál finansa iha Jestaun Merkadu no Turizmu.
“Dezafiu ne’ebé ami hasoru menus rekursu umanu estabelese kargu xefia na’in-rua, maibé seidauk iha kapasitasaun ba ofisiál Finansa. Tanba foin transfere hosi motorista ba iha ofisiál Finansa, ajente no kazual sira mós sei susar atu hala’o servisu tanba foin halo rekrutamentu,” Vitorino do Carmo hato’o bainhira aprezenta progresu servisu iha salaun AMC,Sukaer Laran,kinta ne’e.
Razaun atu kapasita ofisiál finansa sira iha dirasaun Jestaun Merkadu no Turizmu tanba posizaun hosi motorista muda fali ba iha pozisaun ofisiál finansa, nune’e defisil atu hala’o servisu.
Ho dezafiu ne’ebé mak dirasaun Jestaun Merkadu no Turizmu iha Covalima enfrenta diretór mós husu ba administradór atu halo kapasitasaun ba ofisiál no presiza mós halo rekrutamentu iha tempu badak.
Administradór Munisipiu Covalima, Francisco de Andrade, konsidera dezafiu ne’ebé mak dirasaun jestaun merkadu no Turizmu Covalima enfrenta maibé nia mós enkoraja atu hadi’a faillansu ne’ebé mak enfrenta.
“Ha’u komprede ho fallansu ne’ebé sira enfrenta tanba ita-nia kargu foin simu, ne’ebé la kompletu maibé ba oin ita-bo’ot sira tenke hadi’a nune’e ezekusaun no dezafiu sira ita bele hatene ho loloos,” nia hateten.
Jornalista : Celestina Teles
Editór : Cancio Ximenes
