AMC sei identifika fatin turizmu komunitária iha Covalima
COVALIMA, 29 Setembro 2022 (TATOLI)–Administrasaun Munisípiu Covalima (AMC), liuhosi Dirasaun Jestaun Merkadu no Turizmu sei identifika fatin turizmu komunitária iha Covalima ne’ebé iha futuru bele kontribui reseita ba kofre Estadu.
“Kona-ba atu identifika fatin turizmu komunitária iha munisípiu Covalima, dahuluk ami realiza ona sensibilizasaun turizmu komunitária ne’ebé foin kobre iha postu administrativu sira hanesan Maucatar, Fatululik, Fohorem no Fatumea, falta de’it postu Tilomar, Suai no Zumalai mak seidauk kobre,” Diretór Jestaun Merkadu no Turizmu, Vitorino do Carmo, hateten ba jornalista sira, iha salaun administrasaun, Sukaer Laran, kinta ne’e.
Maske hahú trimestre dahuluk no datoluk la konsege finaliza atividade sensibilizasaun turizmu komunitária ba komunidade iha postu administrativu sira, no atividade identifikasaun fatin turizmu komunitária iha Covalima sei kontinua iha trimestre dahaat.
“Ami sei tau planu iha trimestre dahaat atu halo identifikasaun turizmu komunitária mós ami sei realiza iha postu administrative sira iha munisípiu Covalima,” nia promete.
Munisípiu Covalima identifika potensialidade ba área turizmu komunitária hanesan paisajen istória kulturál no istória ba luta ukun rasik an, no haree mós iha agrikultura no peska.
Maske ko’alia turizmu maibé keta haluha tenke-haree mós ba infraestrutura bázika hanesan Estrada, elestridade, hela fatin no halo atendimentu ba turista ho di’ak, nune’e sira kontinua vizita no bele prepara mós produtu local, nune’e komunidade bele hetan rendimentu.
Razaun to’o ohin dirasaun jestaun merkadu no turizmu seidauk identifika fatin turizmu iha Covalima tanba menus rekursu umanu. Maibé ida-ne’e la’ós difikuldade no atu realiza atividade labele pesimista tenke otimista kontinua la’o.
Funsionáriu sira-ne’ebé servisu iha dirasaun jestaun turizmu no merkadu mak hanesan Ofisiál permanente na’in-ida, ajente foin rekrutadu na’in-tolu (3) ho diretór.
Diretór servisu Munisipal Asaun Sosial, Abrão Nascimento husu ba dirasaun jestaun merkadu no turizmu atu dezenvolve fatin turizmu iha suku Suai Loro, postu administrativu Suai, munisípiu Covalima hodi bele atrai turista sira.
Jornalista : Celestina Teles
Editór : Cancio Ximenes
