iklan

COVALIMA, POLÍTIKA

Autoridade Covalima husu administradór postu administrativu kumpre matadalan PMOPA

Autoridade Covalima husu administradór postu administrativu kumpre matadalan PMOPA

Administradór Munisípiu Covalima, Francisco Andrade. Imajen Tatoli/Celestina Teles.

COVALIMA, 29 setembru 2022 (TATOLI)–Adminisradór Munisípiu Covalima, Francisco de Andrade, husu ba administradór postu administrativu sira implementa programa Mão de Obra postu administrativu (PMOPA) tenke kumpre matadalan.

“Implementa PMOPA grupu ida durante loron 20 maibé realidade grupu balun, ha’u haree la to’o loron 20 ne’e entaun osan ne’e lori ba iha ne’ebé. Tanba bainhira atu implementa PMOPA tenke haree iha matadalan PMOPA. Se bainhira kumpre matadalan PMOPA imi sei la’o la sala,”  Francisco de Andrade hato’o bainhira prezide enkontru konsellu koordenasaun munisipál, iha salaun AMC, Sukaer Laran, kinta ne’e.

Autoridade ne’e hateten, administradór postu administrativu sira implementa Programa Mão de Obra Postu Administrativu (PMOPA) kumpre tuir matadalan sei la falla tanba iha matadalan hakerek klaru ona.

“Agora ita atu implementa PMOPA ba faze daruak imi tenke loke livru matadalan. Ha’u hanoin imi kumpre matadalan sei la falla bainhira iha fallansu ruma auditoria sei halo audit,” nia hateten.

Tanba ne’e, nia fó hanoin ba administradór administrativu iha Covalima tanba implementa PMOPA ho orsamentu boot entaun valór orsamentu tenke balansu ho traballadór sira.

“Ha’u fó hanoin ba ita-boot sira tanba orsamentu nia valór boot tenke balansu ho traballadór sira hanensan orsamentu PMOPA mínimu mak hosi postu Fatululik rihun 106 restante bootliu hanesan Suai $125,000. Ha’u lakohi osan boot traballadór grupu ida ema na’in-10 no 20 de’it ne’e la loos,” nia informa.

Tanba orsamentu PMOPA ne’e admiistradór mak jere direta livru matadalan ne’e iha kompeténsia diretór sira halo monitorizasaun de’it, karik iha buat ruma administradór sira mak hasoru direta ho auditória.

Implementa PMOPA prióridade halo manutensaun no hamoos esgotu manutensaun ba Estrada hamoos lixu iha fatin públiku, tanba matadalan PMOPA ko’alia klaru katak labele halo konstrusaun foun maibé halo de’it manutensaun no hamoos esgotu.

Munisípiu Covalima hetan alokasaun (OJE 2022) hosi Ministériu Administrasaun Estatal (MAE) hamutuk $3,990.360 ne’ebé aloka ba saláriu no vensimentu, bens servisu, tranferénsia públiku, kapital menór no Kapital Dezenvolvimentu, aumenta ho orsamentu ba Programa Mão de Obra Postu Administrativu (PMOPA).

Hosi totál orsamentu refere, MAE transfere orsamentu  ba programa Mão de Obra Postu Administrativu (PMOPA) iha Covalima hamutuk $782,102 ba iha konta bankaria  munisípiu nian.

Jornalista   : Celestina Teles

Editór        : Cancio Ximenes

iklan
iklan

Leave a Reply

iklan
error: Content is protected !!