iklan

NASIONÁL, HEADLINE, OÉ-CUSSE (RAEOA), POLÍTIKA

Autoridade no komunidade aldeia Mahata selebra Masakre Kutete ho misa

Autoridade no komunidade aldeia Mahata selebra Masakre Kutete ho misa

Autoridade no komunidade aldeia Mahata, selebra masakre Kutete ho misa no kari ai-funan. Imajen Tatoli/Abílio Elo Nini.

OÉ-CUSSE, 29 setembru 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) hamutuk ho komunidade sira bairru Kutete, aldeia Mahata, suku Costa selebra masakre Kutete ba saudozu Ángelo Queno no saudozu Alarico Bana, ne’ebé mate iha 29 setembru 1999 tanba hetan ono hosi milísia sira.

Selebrasaun masakre Kutete ne’e realiza ho misa no kari ai-funan iha saudozu sira-nia semitériu iha bairru Kutete.

Iha misa selebrasaun masakre Kutete ne’e, dirije hosi Padre Vigáriu hosi Parókia Nossa Señora Dorosariu Oé-Cusse, Florindo de Jesus iha nia omília dehan, sé batar musan ida mak lamonu iha rai, entaun nia sei mate ba beibeik, sei batar ida monu karik ba iha rai, nia sei moris fila-fali no sei folin barak liután.

Nune’e mós nasaun atu hamriik mesak presiza ema mate maibé mate tuir idak-idak nia destinu, balu mate uluk no balu mate ikus.

“Sei ita la mate karik, ita sei lahetan ita-nia independénsia ho lais, tanba povu Timor-Leste sofre durante tinan 24, ida-ne’e sente kleur tebes, entaun atu finaliza presiza ema balu fakar sira-nia raan ba rai doben ida-ne’e, tán ne’e ita sira-ne’ebé moris presiza reza ba sira-nia klamar atu hetan naroman lalehan nian,” Padre Florindo de Jesus akresenta.

Xefe aldeia Mahata, Carlos Boas, informa, masakre Kutete kada tinan komunidade iha bairru ne’e sempre realiza misa no kari ai-funan ba saudozu na’in-rua tanba mate iha 29 setembru 1999 hetan oho hosi milísia pro-integrasaun.

“Saudozu na’in-rua ne’e sira mate tanba envolve iha klandestina, tanba uluk estrutura CNRT Oé-Cusse hotu-hotu mai salva-aan iha fatin ne’e toba no subar iha foho Kutete, entaun katuas na’in-rua ne’e sira mak sai hanesan xefe iha bairru ne’e, milísia sira hatene katak sira na’in-rua mak subar ema intelektuál sira, entaun milísia sira mai asalta iha-ne’e no konsege hamate sira na’in-rua iha fatin ne’e,” Carlos Boas, hato’o kronolójia ne’e iha ámbitu selebrasaun masakre Kutete.

Tán ne’e kada tinan, komunidade iha bairru Kutete, aldeia Mahata sempre selebra, tanba objetivu sira mate la’ós moras maibé oho hosi milísia tanba defende Timor-Leste atu ukun rasik-an.

Prezidente Konsellu Veteranu Oé-Cusse, Martinho da Cunha, konsidera saudozu na’in-rua mós hola-parte iha prosesu luta ba libertasaun nasionál.

“Sira fakar raan hodi mate ba rai ne’e, agora ita ne’ebé moris iha ita-nia konsiénsia patriotizmu ho nasionalizmu tenki moris no buras atubele kontinua sakrifísiu ne’ebé ita-nia eroi sira-nia mehi to’o loron ikus ita bele hetan naroman di’ak liután.

Adjuntu Prezidente Autoridade RAEOA, Maximiano Neno, hanesan jerasaun foun istória sira-ne’e labele haluha, tanba istória sira-ne’e hakerek ho tinta osan-mean hosi jerasaun ba jerasaun tenke valoriza no rekoñese hanesan rikusoin tanba kontribui ba independénsia Timor-Leste.

“Ita atu valoriza loron istóriku sira-ne’e primeiru tenke hametin unidade, dignifika ho dezenvolvimentu ba setór hotu, tenke eskola, dezenvolvimentu fíziku ba infraestrutura, tanba uluk ita luta objetivu rua de’it, primeiru luta atu liberta ita-nia rai ba ukun rasik-aan, segundu luta atu hasai povu hosi kiak no mukit,” nia katak.

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!