PR Horta-Governadór NTT diskute projetu estratéjiku iha fronteira
DILI, 29 setembru 2022 (TATOLI)—Prezidente Repúblika (PR), José Ramos Horta, kuarta (28 setembru) horisehik, ho ekipa Prezidente Indonézia no Governadór Nusa Tenggara Timur (NTT), Viktor Laiskodat, diskute kriasaun zona komérsiu livre no parke Industriál iha Rejiaun Administrativu Espesiál Oé-Cusse Ambeno (RAEOA).
Tuir Xefe Estadu, ninia omólogu Joko Widodo prefere, atu Indonézia apoia ekonomia Timor-Leste hodi la’o ba oin, ho apoiu hosi entidade oioin.
“Projetu rua ne’e, ita bele hateten, Governu ba Governu, business ba business, signifika parte rua envolvidu, ida mak Governu Indonézia no Timor-Leste, seluk mak seitór privadu hosi Indonézia no Timor-Leste, nune’e projetu rua ne’e benefisia Timor-Leste. Ita rasik mak tenke badinas, book an, mobiliza an, mobiliza setór privadu nasionál,” Xefe Estadu hateten liuhosi komunikadu imprensa ne’ebé Agência Tatoli asesu, kinta ne’e.
Prezidente Repúblika mós defende nesesidade atu Governu Indonézia apoia setór privadu no haruka nafatin ekipa empreza estatál Indonézia (Badan Usaha Milik Negara-BUMN) atu kontinua partisipa ativu iha prosesu dezenvolvimentu Timor-Leste.
Xefe Estadu hateten, Governu Indonézia delega Ministru Koordenadór Luhut Panjaitan, hodi lidera kriasaun zona komersiu livre no parke Industriál iha Rejiaun Autónoma Oé-Cusse.
“Prezidente Joko Widodo interesante no motivadu teb-tebes, delegasaun ida hosi Jakarta mai (iha Bali) sira hateten, Prezidente Joko Widodo foin daudaun, bolu sira no ko’alia ho sira no iha semana ida-nia laran, Prezidente Joko Widodo sei telephone ba ha’u. Ohin kalan duni, ko’alia telefone ho Ministru Koordenadór Luhut Panjaitan, nia mak sei reprezenta Indonézia ba hodi koordena projetu ne’e,” Xefe Estadu ne’e hateten.
Horta husu ba Governu, liu-liu Ministériu responsável ba projeitu ne’e hodi diskute detallu projetu ne’e ho Indonézia, tanba Prezidente Repúblika bele halo diplomasia ekonómika maibé labele asina akordu ruma.
“Ita labele la’o neineik, ita atu tama dadaun ba ASEAN, se ita la la’o, la aselera ita-nia prosesu dezenvolvimentu ekonómiku, ita lakonsege hanesan toman ASEAN nian. Ne’eduni, Prezidente Jokowi hakarak, book no book lalais, ajuda ita ho ita-nia ekonomia,” nia dehan.
Durante Vizita Prezidente Repúblika ba Indonézia, membru Governu ne’ebé hola parte iha delegasaun, asina akordu iha setór agrikultura, ekonomia no transporte.
Projetu seluk ne’ebé sei iha faze diskussaun mak apoiu kriasaun komité konjunta iha fronteira, apoia dezenvolvimentu ekonómiku iha fronteira, kriasaun zona komérsiu livre no parke Industriál iha Rejiaun Autónoma Oé-Cusse.
Jornalista : Nelson de Sousa
Editór : Cancio Ximenes
