Saúde munisipál Ainaro husu inan-aman kuidadu hahan ba oan sira
DILI, 29 setembru 2022 (TATOLI) – Diretór Saúde munisípiu Ainaro, Agostinho da Costa, husu inan ho aman sira atu fornese hahan ne’ebé nutritivu ba oan sira, nune’e bele reduz má nutrisaun iha Timor-Leste.
“Ami husu ba família sira atu kuidadu labarik sira hodi labele monu ba má nutrisaun ne’ebé mak grave tanba agora daudaun ita hotu nia esforsu mak atu redúz má nutrisaun iha ita nia-rain”, revela diretór iha salaun Ministériu Finansa, Aitarak-Laran, ohin.
Diretór akresenta, kona-ba má nutrisaun, família sira tenke prepara aihan lokál ne’ebé moos no seguru, hanesan modo tahan no naan ne’ebé mak iha proteína, atu nune’e bele redúz má nutrisaún iha Ainaro.
Tuir dadus hosi Saúde Munisípiu Ainaro, hahú janeiru to’o jullu, rejista má nutrisaun ne’ebé grave hamutuk 19, hosi númeru ne’e, Óspital Referál Maubessi alista nain 10 no Sentru Saúde Hatubuilico rejista nain sia,
Husi númeru ne’e konsegue rekupera hotu, ida ne’e esforsu ne’ebé pesoál saúde sira halo liuhosi fahe informasaun nafatin ba inan ho aman sira katak bainhira prepara aihan karik tenke moos, atu nune’e labarik sira la bele hetan má nutrisaun.
Entretantu, suplementu nutritivu F75 no F100 atualmente suficiente hodi fó ba labarik sira ne’ebé sofre ba má nutrisaun grave.
“Ita nia suplementu nutritivu F75 no F100 sufisiente hela atu responde ba ita nia labarik sira ne’ebé mak sofre má nutrisaun grave”, konklui.
Jornalista : Felicdade Ximenes
Editór : Zezito Silva
