iklan

HEADLINE, MUNISÍPIU, VIQUEQUE

Utilizadór dalan husu parte relevante halo intervensaun dalan kotu Lugatoi

Utilizadór dalan husu parte relevante halo intervensaun dalan kotu Lugatoi

Kondisaun estrada Lugatoi, kinta (29/09). Imajen/Espesiál

VIQUEQUE, 29 setembru 2022 (TATOLI)–Dalan públiku dirasaun Lugatoi, iha suku Caraubalo, postu administrativu Viqueque, mosu erosaun rai halai hodi halo dalan kotu, nune’e difikulta movimentu transporte.

Akontesementu rai halai maizumenus iha tuku 14:00, iha kuarta (29/09), nune’e Polísia Nasionál Timor-Leste (PNTL) dada tali Polísia iha área akontesimentu hodi transporte sira liu ho kuidadu.

Kondutór fuzu, Benjamin da Conceição Sequera, haktuir, daudaun ne’e transporte kiik sira hanesan bus, anguna, truck no motorizada sei iha espasu naton hodi liu maibé kareta fuzu sira labele tanba bele fó risku.

“Daudaun kareta fuzu sira tenke para hotu iha ne’e tanba liu dalan Lugatoi labele. Tanba ne’e, ami husu ministériu relevante sira halo intervensaun imediata atu transporte sira bele halo movimentu. Bainhira Governu la halo intervensaun sedu maka sei difkulta transporte sira ne’ebé halo viajen mai munisípiu Viqueque no munisípiu Dili,” Benjamin da Conceição hateten ba Agência Tatoli, kinta ne’e.

Notísia relevante: Komunidade Lacluta ho inisiativa halibur osan hadi’a dalan kotu Dilór

Tuir utilizadór dalan, to’o agora parte relevante seidauk mai halo intervensaun, maski akontese ona iha meiu dia ne’e.

“Kalan ne’e ami pasiénsia toba de’it iha ne’e tanba ami labele liu. Ohin ha’u mai, ha’u sente triste ho kondisaun estrada ida-ne’e,” nia akresenta.

Kondutór fuzu ne’e tula semente hosi Dili bá Dilór, maibé to’o iha dalan Lugatoi kotu.

Tuir observasaun jornalista Agência Tatoli iha terrenu, nota katak mosu erosaun hodi efeta ba dalan, nune’e kondisaun dalan iha espasu metru ida ba trotoár, nune’e komunidade lokál ho inisiativa kee trotoár hodi loke espasu ba transporte sira bele liu.

To’o kalan, pasajeiru sira kontinua hein hodi ultrapasa tanba laiha dalan alternativa hodi transporte sira liu.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!