DILI, 30 setembru 2022 (TATOLI)-Konferénsia Episkopál Timorense (CET, sigla portugés) kontinua akompaña kazu abuzu hasoru minoridade iha Timor-Leste (TL).
“Konferénsia Episkopál Timorense kontinua akompaña kazu refere ho atentu ba baze legál kualker kazu abuzu seksuál minoridade no adultu vulneravél sira iha Timor-Leste, maibé kompeténsia atu hahú prosesu ne’e rezerva ba Kongregasaun ba doutrina fiar nian ho sekuénsia jurídika ne’ebé previstu no refere iha matadalan sira,” Sekretáriu Ezekutivu CET, hanesan mós portavós, Padre Leandro Maria Alves, hateten liuhusi konferénsia imprensa iha CET, Balide-Dili, sesta ne’e.
Nune’e, bainhira eventualmente prosesu judisiál instala iha Timor-Leste, CET sei respeita no koopera ho prosesu justisa. “Tanba, to’o agora, iha Timor-Leste no Igreja Katólika, hametin nafatin prinsípiu “presunção inocência” (Artigu 34o no 1 Konstituisaun Repúblika Demokrátika Timor-Leste), tanba ne’e Konferénsia Episkopál Timorense nian, labele foti pozisaun refere ba kazu ne’e,” nia dehan.
Maske nune’e, nia salienta mós katak CET nunka aprezenta denúnsia ka keixa abuzu seksuál referidu ba Bispu Dom Carlos Filipe Ximenes Belo, hosi parte ruma hasoru Autoridade Ekleziástiku iha Timor-Leste.
Entretantu, loron 01 fulan-outubru tinan 2021, CET aprova ona matadalan sira kona-ba Protesaun Labarik no Adultu Vulnerável sira nian, introdús hanesan parte integrante hosi konferénsia ne’e, aneksu 01 kona-ba” Motu Proprio Sacramentorum Sanctitatis “, aneksu 02, kona-ba karta Apostólika sira iha forma” Motu proprio vos estis Lux Mundi ” no aneksu 03 kona-ba” Vademecum (manual) husi kongregasaun ba doutrina fiar nian, kona-ba pontu prosedimentu balun ba tratamentu kazu seksuál hasoru minoridade sira ne’ebé komete hosi Clérigos (Na’i-lulik).
“Kazu abuzu seksuál ba Minoridade no adultu vulneravel sira ne’ebé mak prátika hosi Clérigos (nai-lulik) ne’e, sei rai hela ba Kongregasaun doutrina fiar nian (art. 6o do “Motu proprio de sua Santidade Papa Francisco, Sacramentorum Sanctitatis) no akuzasaun sira ne’ebé kontra Bispu Dom Carlos Filipe Ximenes Belo, refere ba artigu ne’ebé mensiona iha leten agora dau-daun órgaun kompetente Santa Sé hala’o hela prova iha vátikanu,” Portavóz CET esplika.
Jornalista : Nelia Fernandes
Editór : Rafy Belo
