EBC 1 Baucau hahú prepara estudante hasoru ezame nasionál

BAUCAU, 30 setembru 2022 (TATOLI) – Ensinu Baziku Sentrál (EBC, sigla portugés) terseiru-siklu númeru 1 Tirilolo, munisípiu Baucau hahú prepara estudante atu hasoru ezame nasionál iha fulan-outubru.

Diretór EBC terseiru-siklu Tirilolo Baucau, Amaro Ximenes Belo, esplika, metéria ezame nasionál finaliza ona no submete ona dadus estudante hodi hein distribui kartaun ezame inklui matéria ezame hosi Ministériu Edukasaun Juventude no Desportu (MEJD).

“Matéria sira ami preparasaun hotu ona, agora ami halo revizaun ba matrix ne’ebé nasionál mak prepara tenke la’o-tuir tanba sai matadalan ba matéria ezame nasionál,” Diretór EBC terseiru siklu Tirilolo Baucau informa iha Vila Antiga, sesta ne’e.

Matéria sira-ne’ebé sei fó-sai iha ezame kompostu matéria lókal hamutuk neen hanesan desportu, artístika, étika, FDH, belas artes no matéria relijiaun sei prepara inklui sei kurreje hosi Konektil.

Enkuantu matéria ezame nasionál hamutuk lima hanesan matemátika, siénsia fíziku naturál, ingles, portugés no istória jeografika.

Matéria sei foti porsentu hosi sétimu no oitavu-anu 30% no 40%, hosi nonu-anu ne’ebé sei sai sasukat ba estudante atu pasa ka lae.

EBC terseiru siklu Tirilolo rejista estudante hamutuk na’in-223 mak sei tuir ezame nasionál ne’ebé inklui ona eskola paralelu Buruma na’in-39 ne’ebé tuir sei ezame durante semana-ida, hahú iha loron-24 fulan-outubru.

“Atu prosesu pasa ka lae iha estudante nia liman nune’e ami-nia mensajen ba sira atu estuda maka’as tanba sei hela semana-tolu,” Amaro Belo akresenta.

EBC Tirilolo hamutuk eskola fillál hamutuk ualu ho tótal estudante hamutuk 1.997 no profesór kontratadu no permanente na’in-40 no part time na’in-12.

Jornalista   : Natalino Belo 

Editór          : Evaristo Soares Martins