IJT husu administradór postu distribui ekipamentu protesaun ba traballadór PMOPA
COVALIMA, 30 setembru 2022 (TATOLI) – Inspesaun Jerál Traballu (IJT) husu ba administradór postu administrativu sira implementa programa Mão de Obra Postu Administrativu (PMOPA) tenke distribui ekipamentu protesaun ba traballadór sira.
Inspetór Regionál Covalima, Gabriel Gusmão husu relasiona administradór postu administrativu Fatululik bainhira aprezenta programa imlementasaun PMOPA iha salaun Administrador Munisipal Covalima (AMC), ne’ebé hatudu iha fotografia katak traballadór balun la iha ekipamentu protesaun.
“Ha’u haree ema barak mak la uza ekipamentu protesaun individual tanba ekipamentu ne’e importante bazea ba lei traballu númeru 4/2012 deskreve ona ema hotu servisu tenke iha ekipamentu protesaun ba nia-an rasik maibe dala barak la halo tuir,” Gabriel Gusmão hato’o iha salaun AMC Sukaer laran, Covalima.
Ho nune’e nia mós dehan, iha artigu 34 no 36 ne’e ko’alia mós konaba seguransa saúde ijene do traballu tanba ne’e bainhira traballadór la utiliza ekipamentu protesaun ba nia-an rasik ne’e bele prejudika ba sira nia saúde.
Tamba ne’e, nia hatutan tan, lei obriga kuandu ema sira ne’ebe mak servisu hanesan ne’e obrigatóriu uza ekipamentu protesaun individual.
“Ha’u hakarak fó atensaun de’it ita hotu-hotu tenki kumpri ba lei ne’ebé iha ona,” nia husu.
Administradór Postu Administrativu Fatululik, José Afonso rekoñese traballadór implementa programa PMOPA balun la iha sapatu no kapasete.
“Los duni ha’u rekoñese traballadór balun la iha sepatu no kapaseti, tamba ne’e ha’u husu lori osan sosa ekipamentu di’ak liu hodi fó ba traballadór sira. Konaba sepatu ida-ne’e la prevee iha PMOPA , maibé kapaseti, luvas no rompi ami sei foti osan sira ne’ebé uza la hotu ha’u sei uja tanba ne’e osan povu ni’an,” nia klarifika.
Tuir dadus traballadór ne’ebé servisu iha implementasuan programa PMOPA iha postu administrativu Fatululik hamutuk na’in 342. Ema sira ne’e mai hosi suku fatululik na’in-120 kompostu mane 90, no feto 30. Parte seluk hosi suku Taroman 232 kompostu mane 167 feto 55.
Jornalista : Celestina Teles
Editór : Armandina Moniz
