MJ sei atribui títulu rai ba uma veteranu no UKL iha novembru
OÉ-CUSSE, 30 setembru 2022 (TATOLI) – Ministériu Justisa (MJ) hamutuk ho dirijente sira, sesta ne’e realiza enkontru liña koordenasaun ho Autoridade Rejiaun Administrativa Espesiál Oé-Cusse Ambeno (RAEOA), hodi prepara atribui títulu rai ba uma veteranu no Uma Kbiit Laek (UKL) iha Oé-Cusse sei akontese iha loron 28 novembru tinan ne’e.
Ministériu Justisa, Tiago Amaral Sarmento, informa, atu susesa no fó rezultadu ne’e presiza halo liña koordenasaun ho Autoridade RAEOA molok entrega direitu títulu rai ba sidadaun hotu iha Oé-Cusse.
“Agora ami lori rezultadu mai tanba dekretu-lei kona-ba informasaun kadastru perdiál, governu no xefe estadu promulga tiha ona, no daudaun ne’e públika ona iha Jornál Repúblika, entaun tempu ona atu implementa,” Tiago Sarmento, informa ba jornalista hafoin enkontru iha Gabinete ZEESM Oé-Cusse.
Governante ne’e afirma, polítika VIII Governu liuhosi MJ molok entrega títulu rai presiza koordena hamutuk ho Autoridade RAEOA, mak sei organiza no sei hala’o liuhosi eventu espesiál iha loron 28 novembru 2022, atubele atribui sertifikadu títulu rai ba sidadaun hotu iha Oé-Cusse.
“Polítika Governu nian, ida-ne’e primeira faze, sei konsentra uluk ba uma veteranu no UKL sira nian, depois ba iha segunda terseira faze, entaun ohin ne’e ami mai halo liña koordenasaun ho autoridade RAEOA, nune’e bele kria planu atubele fó susesu ba atividade ne’e iha 28 novembru,” Tiago Sarmento afirma.
Governante ne’e la esplika detalla kona-bá dadus nian, maibé Ministériu Justisa daudaun ne’e simu ona dadus ba uma veteranu hosi Ministériu Kombatente Libertasaun Nasionál no dadus UKL simu ona hosi Ministériu Administrasaun Estatál (MAE) ba iha territóriu nasionál.
“Ita simu ona dadus sira-ne’e, depois ita halo levnatamentu hamutuk ho tékniku MAE iha kada munisipíu hotu-hotu, lista kompleta hotu ona 12 munisipíu no RAEOA, tán ne’e horisehik RAEOA hahú ona ba levantamentu UKL, nia rezultadu 28 novembru mak ita atribui títulu,” nia katak.
Jornalista : Abílio Elo Nini
Editór : Evaristo Soares Martins
