DILI, 30 setembru 2022 (TATOLI) – Prezidente Komité 12 Novembru, Gregório Saldanha, revela Timor-Leste nesesáriu kombate korupsaun no husik entrega ba Vatikanu mak responde kazu Amu Belo ne’ebé deskonfia halo abuzu sexuál ba minoridade ne’ebé akontese iha 1990.
“Timor-Leste di’ak liu servisu nafatin hodi kombate buat aat sira ne’ebé lori afeta ba ita-nia povo, hanesan moris susar, moras, korupsaun, falimiarizmu, diskriminasaun, injustisa, violénsia, droga, kampu servisu, eskola, ospitál laiha kondisaun, mudansa klimátika, dezastre naturál no seluk tan”, Gregório Saldanha, hateten jornalista sira, iha konferénsia imprensa, iha resintu Komité 12 Novembru, Balide, Dili sesta ne’e.
Prezidente Komité 12 Novembru, hateten atu di’ak liu hakruuk no entrega ba Santa Sé ka Vatikanu tanba nia mak iha kompeténsia atu haree ba kazu Amu Belo nian.
“Informasaun refere ne’e husik Santa Sé mak bele hatán tanba nia mak iha kompeténsia tomak ba kazu Amu Belo nian”, salienta.
“La’os ami-nia kompeténsia atu hateten akuzasaun ba Amu Belo, loos ka sala, ami entrega no hakruuk ba kompeténsia Vatikanu nian. Maibé bele oinsá mós ami hamriik nafatin iha Amu Belo nia sorin, tanba ami konsiente katak umanu, iha mós frakeza hanesan ema seluk”,afirma.
Nia dehan, maske Amu Belo karik sala, mas labele halakon Amu Belo nia di’ak barak ba rai doben ida-ne’e, iha momentu difisíl nia-laran.
Jornalista :Osória Marques
Editór : Zezito Silva
