VIQUEQUE, 02 outubru 2022 (TATOLI)- Don Virgílio Cardeal do Carmo da Silva, inaugura igraja foun ida, iha suku Uaimori, postu adiministrativu Viqueque, munisípiu Viqueque.
Don Virgílio Kardeal do Carmo da Silva, esplika, igreja nu’udar povu Maromak ninian, komunidade fiar-na’in ne’ebé halibur iha fiar ida de’it. Mak fiar ba Maromak santísima trindade, Maromak amán oan no espíritu santu.
“Tanba ne’e harii igreja ida-ne’e inisiativa hosi padre Elizio Locateli bainhira nia halo misa iha Uaime, postu adiministrativu Vemasse, katuas liurai hosi suku Uaimori ba partisipa hotu misa. Depois misa hotu liurai Uaimori hateten ba Padre Locateli tempu ruma bá halo misa mós iha Uaimori. Nune’e Padre Locateli hateten ba liurai katak Uaimori pertense Parókia Viqueque nian, la’ós pertense iha Vemasse, maibé Padre Locateli sente ho liafuan sira ne’ebé mai hosi liurai Uaimori, nia sente fuan la hakmetek no liurai Uaimori dehan tán ba Padre Locateli povu Uaimori governu haluha tiha nomós igreja haluha hotu sarani sira hosi Uaimori,” Don Virgílio Cardeal.do Carmo da Silva, hateten iha ninia omília, iha selebrasaun bensaun igreja Uaimori-Tula, sábadu ne’e.
Don Virgílio hatutan, sarani Uaimori sente hamrook no hamlaha ba klamar nian nune’e padre Locateli lori ninia fuan boot ba sarani Uaimori no halo misa ba sarani sira inklui konsege kria igreja ba sarani Uamori.
“Ida-ne’e maka ita dehan pastór ida-ne’ebé buka duni bibi ne’ebé lakon no ida-ne’e maka bibi atan buka ninia bibi sira-ne’ebé durante ne’e lakon. Padre Locateli la sente kolen hodi halibur ninia bibi sira,” Eminénsia Don Virgílio Cardeal haktuir.
Líder Igreja Katóliku ne’e hatutan, uluk sarani Uamori laiha uma Maromak no uma orasaun, maibé agora iha ona uma Maromak nian no uma orasaun atu sarani sira bele rona Maromak nian liafuan.
“Ita konsagra ona igreja ida-ne’e hodi selebra ministériu Jesus nian mate, moris hias, eukaristia ita bele hasoru malu ho Maromak iha fatin ida-ne’e. Uma igreja ida-ne’e ita hateke hosi dook haree furak tebes,” nia akresneta.
Nune’e nia husu agradese ba arkitetu sira no agradese ba ema hotu-hotu ninia sakrifísiu hodi konstrui igreja Uaimori nian.
“Ita agradese tanba iha ona igreja, maibé ita sente fuan kanek liután bainhira sarani laiha. Ha’u hanoin ida-ne’e responsabilidade ba autoridade, katekista no sarani sira nian serbisu hodi tau matan ba igreja no halibur nafatin sarani sira iha Uaimori,” nia hato’o.
Bainhira misa ramata xefe suku Uaimori, Francelino Antonio Gomes, sente kontente ba igreja foun ida-ne’e no agradese ba padre Elizio Locateli ne’ebé buka tuir ninia sarani no agora sarani Uaimori bele hetan igreja furak no nabilan iha rai Uaimori.
“Ami Uaimori agradese ba amu Locateli ne’ebé buka tuir ninia sarani sira no kria uma kreda ba ami Uaimori. Ami Uaimori durante isin maka bokur, klamar sei krekas, maibé agora klamar bokur ona tanba ami iha ona uma kreda ida-ne’ebé furak iha ami-nia suku ida-ne,” nia hato’o.
Autoridade suku Uaimori ne’e haktuir, durante ne’e suku Uaimori selebra misa iha bilioteka no sede suku, maibé daudaun ne’e iha ona fatin hodi selebra misa.
Enkuantu Konstrusaun igreja Uaimori-Tula hetan apoia orsamentu hosi atingu alunu Don Bosco no sarani Uaimori hodi kostrui igreja São Callistro Caravario, rezidénsia no moru gasta orsamentu totál hamutuk $124,748.48 ho medida 22×15.
Suku Uaimori totál aldeia neen ho totál abitante hamutuk na’in 1,142 kompostu hosi feto hamutuk na’in-564 no mane 578.
Jornalista: Vitorino Lopes daCosta
Editór : Evaristo Soares Martins
