iklan

DILI, POLÍTIKA

Deputadu Fretilin-PLP preokupa kondisaun servisu autoridade judisiál iha munisípiu sira

Deputadu Fretilin-PLP preokupa kondisaun servisu autoridade judisiál iha munisípiu sira

Bandeira partidu Fretilin ho PLP.

DILI, 03 outubru 2022 (TATOLI)-Deputadu hosi bankada Frente Revolusionária Timor-Leste Indepedente (Fretilin) ho Partidu Libertasaun Populár (PLP) preokupa kondisaun servisu autoridade judisiál iha munisípiu sira, liu-liu Baukau, tanba ne’e husu ba governu atu toma atensaun.

“Bazea ba ami-nia fiskalizasaun (komisaun A) bá munisípiu Baukau, ami rona no haree direta preokupasaun (juis, prokuradór no defensór públiku) serbisu de’it mós bee-moos laiha, ekipamentu atu servisu atende kliente la sufisiente, liuliu fatin ba juis sira atu hela la seguru, tanba uma ne’ebé hela aluga”, deputada PLP, Domingas dos Santos, levanta liuhosi reuniaun plenária, segunda ne’e.

Domingas dos Santos hatutan: “Ida mós sira iha transporte ba juis ida, maibé laiha motorista, sira rasik mak tenke lori karreta ba mai, halo preokupa tebes”.

Preokupasaun ne’ebé Defensória Públika hasoru mak sae karreta hamutuk ho juis sira. “Hatudu ba ita-nia sidadaun no povu duvida liu ba justisa iha ita-nia nasaun ida ne’e”, nia hatutan tan.

Deputadu bankada Fretilin, Dario Madeira, sujere ba Ministéiru Justisa (MJ) presiza halo vizita ba Defensória Públika iha territóriu tomak. Kondisaun ne’ebé deputada PLP levanta la’ós iha Baukau de’it.

“Situasaun sira ne’e hanesan iha Suai, Baukau, Oekusi nia kondisaun hanesan, orsamentu ida agora (2023) ami husu ministéiru tenke responde, tanba Defensória Públika ne’ebé ami ba vizita sira-nia kondisaun lamentavel tebes, meza no  kadeira de’it hodi tuur laiha, komputadór de’it laiha atu ema servisu ho dokumentu, agora Diretór Defensória durante mai iha ne’e la hatene, resposta ne’e ba to’o iha ne’ebé”.

Nia dehan PN tau orsamentu adisionál atu sosa karreta lima hodi distribui ba Defensória Públika iha munisípiu sira, maibé durante vizita iha terenu katak laiha karreta ne’ebé atribui.

Dario Madeira, hatutan Tribunál Baukau nia kondisaun la permite duni, dokumentu barak ne’ebé presiza arkivu di’ak maibé tau arbiru de’it, tanba laiha kondisaun.

Notísia relevante: Defensoria públika Covalima laiha transporte

Hatán ba preokupasaun ne’e, Governu liuhosi Ministru ba Asuntu Parlamentár no Komunikasaun Sosiál (MAPKOMS), Francisco Jeronimo, rejista, enkamiña ba ministru tutela hodi fó resposta.

Jornalista       : Nelson de Sousa

Editora           : Rita Almeida

iklan
iklan

Leave a Reply

iklan
error: Content is protected !!