Janeiru-setembru 2022, DTC hatama reseita $42,765 ba kofre estadu

COVALIMA,  03 Outubru   2022 (TATOLI) – Diretór Diresaun Transporte no Komunikasaun (DTC), Joaquim Gusmão, hateten hahú  hosi  janeiru to’o  setembru  tinan 2022,  DTC hatama ona reseita $42,765 ba kofre estadu.

“Hahú  janeiru to’o setembru tinan 2022 DTC hatama ona reseita  $42,765 ba kofre estadu.  Reseita hirak ne’e  DTC hatama liuhosi   inspesaun ba veíkulu, lisensa  trájetu, karta kondusaun no rejistu,”  Joaquim Gusmão dehan ba Tatoli,  iha resintu Administradór Munisípiu Covalima (AMC), Sukaer-Laran, segunda ne’e.

Nia dehan, DTC kontribui reseita hahú  hosi fulan janeiru to’o  setembru hamutuk $ 42,765 ne’ebé iha fulan janeiru kontribui $7,390.00, fevereiru $4,850.00, marsu ($3,715.00), abríl ($2,830.00), maiu ($3,010.00),  juñu ($4,105.00), jullu  ($5,725.00), agostu ($5,385.00) no setembru $5,755.00.

Reseita sira-ne’e DTC kontribui husi parte inspesaun kareta no motór  hamutuk  2.985 hodi  kontribui reseita $30,830.00, lisensa trájetu iha  118 (reseita $ 2,695.00). Parte seluk, bá fali  karta kondusaun iha 320 no  kontribui reseita $ 6,090.00, no parte rejistu nian  iha 289 no  kontribui reseitas iha $3,150.00.

Nia dehan, maski DTC  hasoru dezafiu kona-ba  edifísiu própriu ne’ebé laiha atu halo atendimentu ba sidadaun sira, maibé sira  uza de’it  salaun hosi Servisu Obra Públika  Munisípiu Covalima hodi nafatin hala’o servisu.

“Ho dezafiu ami seidauk halo atendimentu ho di’ak ba sidadaun sira ne’ebé mak trata dokumentu kareta no motorizada ne’ebé halo inspesaun sei uza ho manuál de’it,” nia hateten.

Nia husu ba sidadaun sira ne’ebé mak uza veíkulu estadu no públiku periodikamente tenke  halo renovasaun ba karta  kondusaun ka karta sira seluk ne’ebé liga ba transporte.

Jornalista : Celestina Teles

Editóra     :  Armandina Moniz