iklan

DILI, HEADLINE, INKLUZAUN SOSIÁL

MSSI aloka orsamentu rihun $80 hodi estabelese Konsellu Nasionál EhD

MSSI aloka orsamentu rihun $80 hodi estabelese Konsellu Nasionál EhD

Diretór Nasionál Promosaun Direitu ba Ema ho Defisiénsia, Mateus da Silva.

DILI, 03 outubru 2022 (TATOLI) – Ministériu Solidariedade Sosiál no Inkluzaun (MSSI) liuhosi Diresaun Nasionál Promosaun Direitu ba Ema ho Defisiénsia prevé verba hamutuk rihun $80 ho objetivu atu estabelese Konsellu  Nasionál Ema ho Defisiénsia (EhD).

“Osan $80.000 mak ita tau ba planu estabelesimentu Konsellu Nasionál ba Ema ho Defisiénsia (EHD) sira iha Timor-Leste”, Diretór Nasionál Promosaun Direitu ba Ema ho Defisiénsia, Mateus da Silva, dehan ba Ajénsia Tatoli, iha nia knar fatin Caicoli, Dili, ohin.

Responsável ne’e esplika orsamentu ida ne’e atu uza hodi halo rekrutamentu ba funsionáriu sira atu sevisu bainhira estabelese ona Konsellu Nasionál ba EhD.

Estabelesimentu ida ne’e, Komisaun Instaladora sei halo reuniaun ikus ho organizasaun sira EhD hafoin entrega Planu Asaun Nasionál ba Konsellu Ministru hodi halo diskusaun

“Atu implementa Planu Asaun Nasionál ne’e ita sei konsulta ikus ho organizasaun ne’ebé mak servisu ba EhD sira iha Timor-Leste. Bainhira enkontru ikus hotu no iha ona nia rezultadu mak foin lori ba Konsellu Ministru hodi halo diskute asuntu ne’e hodi apresiasaun no aprovasaun”, revela.

Tuir diretór, organizasaun EhD mak atu halo diskusaun kona-ba estabelesimentu Konsellu Nasionál ho Asosiasaun Halibur Defisiénsia Matan Timor-Leste (AHDMTL), Asosiasaun Defisiénsia Timor-Leste (ADTL), Rais Hadomi Timoroan (RHTO) no Klibur Defisiénsia Tilun Timor-Leste.

Recorda katak atu garante promosaun ba direitu ema ho defisiénsia iha períodu 2021 to’o 2030, mak tuir orientasaun sira ne’ebé define ona hosi polítika nasionál ba inkluzaun no promosaun direitu ema ho defisiensia, ne’ebé aprova liuhosi Rezolusaun Goveru númeru 14/2012 , loron 09 maiu , liuhosi asaun lubun ida atu dezenvolve ho forma artikulada hosi entidade públika sira.

Planu asaun ne’e ho objetivu atu fó asisténsia no protesaun di’ak ba ema ho defisiensia iha Timor-Leste, maibé presiza kooperasaun no kolaborasaun servisu ida integradu-ho liña ministeriál inklui parseiru sira hotu hodi implementa. Polítika nasionál ba ema ho defisiensia no inkluzaun importante atu tulun Governu hodi fó asisténsia no protesaun di’ak ba sidadaun sira bele atu iha asesu inkluziva iha área edukasaun, saúde, justisa, formasaun profisionál no empregu, transporte públiku, desportu no seluk tan.

Jornalista : Osória Marques

Editór : Zezito Silva

iklan
iklan

Leave a Reply

iklan
error: Content is protected !!