Prosesu reabilita estrada rurál Lokeu ba mota Tafara atinji ona 37,78%
COVALIMA, 03 Outubru 2022 (TATOLI) – Kompañia Holpilat Uni Pesoal LDA, reabilita ona estrada rurál hahú hosi Lokeu, Suku Debos ,Postu Suai ba mota Tafara, Suku Dato Tolu, Postu administrativu Fohorem, aldeia Lakalese, munisípiu Covalima atinji ona 37,78% ho distansia kilometru tolu (3).
“Prosesu reabilita estrada rurál hosi Suai parte Lokeu to’o iha mota Tafara ho distansia kilometru tolu no oras ne’e dadaun atinji ona 37,78%. Ami haree kompañia konstrui ona valeta tuir dezeñu BoQ. Ami mos haruka kompañia fui de’it sumenti,” Diretór Servisu Munisipal Obras Públika Covalima , Alberto Cardoso dehan ba jornalista sira, iha resintu Administrador Munisipiu Covalima (AMC),Sukaer-Laran,segunda ne’e.
Nia dehan tan, agora dadaun ne’e kompañia reabilita hela estrada ne’ebé la’o diak iha tereñu, ne’ebé ho nia durasaun tempu ba kompañia atu halo reabilitasaun estrada rurál durante tinan ida.
Nia hatutan tan katak, durante tinan ida kompañia la konsege finaliza reabilitasaun estrada refere, tenke halo justifikasaun nune’e iha relatóriu ba nasionál nune’e bele estende tan kompañia nia kontratu.
“Kompañia la konsege finaliza durante tinan ida tenke halo justifikasaun no ita sei enkamina atu halo estensaun kontratu foun ba kompañia. Tanba, tuir lolos Kompañia Holpilat Uni Pesoál LDA hahú implementa inisia fulan dezembro tinan 2021 maibé kompañia foin hahú reabilita estrada iha fulan juñu tinan 2022,” dehan nia.
Diretór nee aumenta tan katak, kompañia hahú ona nia atividade iha tereñu ne’ebé konstrui esgotu no hada moru protesaun atinji ona 37,78% ho total orsamentu $371,196,19.
Jornalista : Celestina Teles
Editóra : Armandina Moniz
