Servisu Saúde Covalima rejistu pasiénte HIV na’in-75

COVALIMA,  03 Outubru   2022 (TATOLI) – Koordenadór Programa Servisu Saúde HIV/SIDA, João Ramalho informa, oras ne’e iha Servisu Saúde HIV/SIDA Munisípiu Covalima rejistu ona pasiénte ho moras HIV hamutuk na’in-75.

“Foin lalais iha trimestre dahuluk ita  iha pasiénte na’in-69 mak rejistu ho moras HIV, maibé agora sae ba na’in-75. Hosi total ne’e, na’in- 37 halao  tratamentu ativu iha Suai, na’in-13   tranfere   ba munisípiu  Dili no Bobonaro. No  na’in-23 lakon vida nomos  nain-rua la halao tratamentu,” João Ramalho relata dadus ne’e ba jornalista, iha nia kna’ar fatin, suku Camanasa, segunda ne’e.

Nia dehan husi total pasiente na’in 75 ne’e  rejistu husi  tinan 2012 to’o setembru tinan 2022.

Koordenadór João mos dehan tan, pasiénte sofre moras HIV maioria  ho idade produtivu husi tinan 25 to’o 45.

Tuir dadus pasiénte sofre moras HIV na’in-75 ne’e ,na’in-23 mak lakon ona vida tanba lakoi hakbseik an ba fasilidade saúde. Ida ne’e akontese, tanba  pasiénte HIV balun rona informasaun hosi viziñu hodi hemu aimoruk tradisionál no la hemu aimoruk tuir reseita hosi mediku no na’in-rua drop out tanba la foti ai-moruk.

“Ita hatene katak kutun ba HIV seidauk iha aimoruk atu bele oho virus refere maibé ita iha ai-moruk ho naran antri retro viral (ARV) hodi bele konsumu pada   hasa’e sira-nia imunidade kontra virus iha sira-nia isin nune’e moras seluk labele ataka sira,” nia dehan.

Ho nune’e nia husu ba pasiénte sira  sofre moras HIV atu dehan mundu seidauk iha aimoruk tradisional no ai moruk médiku seidauk deteta atu kura moras HIV.  Nune’e mantein hemu ai moruk ne’ebé oferese hosi Ministériu Saúde liuhosi fasilidade saúde ne’ebé mak asesu tenke hemu tuir reseita hosi dotór sira.

Jornalista  :Celestina Teles

Editóra    : Armandina Moniz