iklan

BAUCAU, HEADLINE, MUNISÍPIU, POLÍTIKA

AMRT rekolla istória luta hosi kaixa postál Kau dade Bercoli

AMRT rekolla istória luta hosi kaixa postál Kau dade Bercoli

Lutadór hosi kaixa postál Kau dade, Bercoli, suku Uma Ana-Ulu, konta istória luta bainhira hetan intervista hosi ekipa AMRT, tersa (04/10). Imajen Tatoli/Natalino Belo.

BAUCAU, 04 outubru 2022 (TATOLI) – Arkivu Muzéu no Rezisténsia Timorense (AMRT, sigla portugés) tersa ne’e, rekolla istória luta no dokumentu iha kaixa postál Kau dade, iha área Bercoli, suku Uma Ana-Ulu, postu administrativu Venilale, munisípiu Baucau.

Sasin moris atúal xefe suku Uma Ana-ulu, postu administrativu Venilale, Vicente de Sousa Boavida ho kódigu funu ‘Sala Laek’ nu’udar veteranu, hahú partisipa iha luta ba ukun rasik-aan iha área Caibuilori iha fulan-dezembru tinan 1975, bainhira forsa indonézia invade Timor-Leste no hamutuk ho komunidade Bercoli evakua ba foho matebian inklui Uaimori to’o tinan 1979.

Nune’e, tún fali hodi kontinua partisipa iha luta klandestina iha tinan 1980 liuhosi kolaborasaun saudozu asisténsia Ernesto ‘Nahabai’.

“Prezensa ARMT importante tanba independénsia dala-ida, istória dala-ida, nasaun ida tenke iha istória, AMRT hanesan fatin atu rai-hela Timor nia istória ba oan sira iha futuru,” Vicente de Sousa Boavida hateten iha Bercoli, tersa ne’e.

Saudozu Nahabai mak halo kontaktu ho Vicente Boavida ‘Sala Laek’ mezmu seidauk iha orientasaun hosi komandu luta iha ai-laran hanesan situasaun jerál kona-ba kolaborasaun entre komunidade ho FALINTIL.

Sala Laek rasik evakua ba ai-laran dala-rua no apoia luta iha vila-laran inklui forsa indonézia kaptura iha tinan 1989 to’o liberta iha tinan-1990 no kontinua halo koneksaun ho komandu luta iha tinan 1996 to’o tinan 1999 Timor-Leste hetan independénsia liuhosi konsulta populár iha loron 30 fulan-agostu.

“Ha’u la kole no la lakon vontade atu luta ba prosesu libertasaun pátria,” Sala Laek akresenta.

Sala Laek nu’udar abitante iha área Bercoli hamutuk ho kompañeiru luta sira-seluk hahú halo ligasaun ho gerilleiru sira hanesan iha área koneksaun informaun hosi vila ba ai-laran, liuliu setór ponta leste no sentru leste.

Iha tinan 1986, Sala Laek hahú estabelese rede klandestina iha área Bercoli hanesan harii kaixa rua kompostu kaixa postál Kau Dade no Uaidaba hodi entrega hela ba kompañeiru luta iha Bercoli no Sala Laek’ tenke evakua ba ai-laran atu dezvia atensaun forsa Indonézia tanba hahú deteta ona movimentu iha área refere.

Iha loron 17 fulan-janeiru tinan 1989, Vicente Boavida ‘Sala Laek’ tenke lakon kontaktu durante fulan-ualu bainhira forsa indonézia deteta ho tiru saudozu kolaboradór komandu luta Xanana Gusmão, Domingos Castro to’o hakotu iis.

Iha loron 29 fulan setembru tinan-1989, Sala Laek hahú koordena ho Padre Locatelli, SDB, hodi halo preparasaun ba vizita Papa Paulo VI mai Timor-Leste, maibé hetan presaun hosi forsa Indonézia iha postu administrativu Ossu, munisípiu Viqueque no lori ba dadur iha komarka Balide, Dili to’o hetan libertasaun iha fulan agustu tinan 1990.

Hosi tinan 1990, Sala Laek kontinua serbisu hamutuk ho Padre Locatelli iha Fatumaca to’o tinan 1996 hetan fali kontaktu ho komandu luta bainhira hakerek karta ba Bispu Dom Carlos Filipe Ximenes Belo, SDB, hodi kontinua halo serbisu ligasaun entre ai-laran no rai-li’ur.

Aleinde halo entrevista ba sasin na’in-neen, AMRT rekolla mós dokumentu hanesan karta korrespondénsia hosi Sala Laek ba Bispu Dom Carlos Filipe Ximenes Belo, igreza hato’o ba komandu da luta,  reprezentante diplomátika José Ramos Horta, ba prezidente portugál, Jorge Sampaio no sekretáriu jerál ONU Koffi Annan.

Jornalista    : Natalino Belo

Editór           : Evaristo Soares Martin

iklan
iklan

Leave a Reply

iklan
error: Content is protected !!