iklan

NASIONÁL, HEADLINE, KAPITÁL

APNIC no ANC realiza formasaun internet routing ba instituisaun Estadu

APNIC no ANC realiza formasaun internet routing ba instituisaun Estadu

Ilustrasaun Servisu interkoneksaun. Imajen/Espesiál

DILI, 04 outubru 2022 (TATOLI)—The Asia Pacific Network Information Centre (APNIC) ho kolaborasaun Autoridade Nasional Komunikasaun (ANC, sigla portugés), tersa ne’e, fó formasaun kona-ba internet routing ba instituisaun Estadu no operadór telekomunikasaun sira iha Timor-Leste.

Diretór Tékniku ba Setór Regulatóriu ANC, Vidal dos Santos, hateten, agradese ba APNIC ne’ebé realiza atividade ne’e.

“Kada tinan instituisaun rua kolabora hodi fó formasaun kona-ba internet routing ba ANC, instituisaun Governu no operadór telekomunikasaun iha Timor-Leste, ho objetivu atu hatene seguransa asesu ka utilizasaun internet nian,” Diretór informa iha salaun Ministériu Transporte no Komunikasaun (MTK), Merkadu-Lama.

Notísia relevante: ANC-APNIC realiza webinar kona-ba rekezitu fornesimentu servisu internet

Entidade sira ne’ebé partisipa iha atividade ne’e mak hanesan hosi Governu, operadór telekomunikasaun hanesan Timor Telecom, Telemor, Telkomcel no Internet Service Provider (ISP) ne’ebé opera.

Atividade sei realiza durante loron-tolu, ne’ebé aprezenta hosi APNIC Sheryl (Shane) Hermoso, nu’udar Jerente formasaun no Dewangga Alam nu’udar Instrutór Komunidade APNIC.

“Espera ami-nia prezensa iha ne’e bele fó esperénsia barak hodi aumenta ita-boot sira-nia koñesimentu oinsá bele hatene seguransa internet nian,” nia akresenta.

Iha fatin hanesan, Diretór Jerál MTK, Gaspar de Araújo, husu partisipante sira atu aproveita didi’ak formasaun tanba liuhosi atividade ne’e sei fó esperénsia barak kona-ba internet routing.

“MTK nia programa oinsá dezenvolve rekursu umanu iha setór teknolojia informasaun. APNIC nia prezensa importante tebes tanba bele dezenvolve rekursu umanu liuliu ba teknolojia informasaun ne’ebé sei menus iha órgaun governamentál sira. Ida-ne’e mós tanba ita iha preparasaun ba projetu fibra ótika,” nia tenik.

APNIC nu’udar Rejistu Rejionál ba Enderesu Internet (RIP) ba rejiaun Ázia Pasífiku no fornese alokasaun rekursu ba númeru no servisu rejistu ne’ebé suporta operasaun internet globál.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!