Estoke vasina Pfizer hahú mamuk iha fasilidade saúde munisípiu Dili
DILI, 04 outubru 2022 (TATOLI)— Diretora Servisu Saúde Munisípiu Dili, Agostinha Segurado, informa daudaun ne’e, estoke vasina Pfizer hahú mamuk iha fasilidade saúde sira iha munisípiu Dili.
“Ita nia estoke vasina Pfizer hahú mamuk ka laiha ona iha fasilidade saúde sira iha munisípiu Dili, no armazein nasionál mós mamuk ona. Maibé estoke vasina Sinovac mak sei iha” Diretora ne’e hateten ba Agência TATOLI iha Matadoru-Dili, tersa ne’e.
SSMD hein hela apoia estoke vasina hosi doadór sira liuliu Fundu Nasaun Unida ba Labarik (UNICEF).
Governu liuhosi Minsitériu Saúde lansa vasina Pfizer Booster ka doze datoluk hahú hosi janeiru to’o setembru 2022, konsege vasina ona populasaun hamutuk 20.000-resin iha kapitál Dili, hodi hasa’e imunidade ema ida-idak hasoru COVID-19.
Tuir dadus husi Ministériu Saúde katak populasaun elijível tinan 18 ba leten, ne’ebé simu ona vasina to’o iha loron 26 setembru 2022, tuir sistema informasaun Saúde iha Ministériu Saúde, hanesan kumulativu 1ª doze iha Dili 89,5% no kumulativu 2ª doze iha Dili 86,0% no doze datoluk iha Dili 29,9%.
Enkuantu, Sidadaun iha territóriu nasionál ne’ebé simu ona vasina doze dahuluk iha Timor-Leste 87,9%, simu ona doze daruak 77,7%, no doze datoluk 27,4%
Nune’e hahú husi 21 marsu 2020 to’o 27 setembru iha kumulativu kazu konfirmadu hamutuk 23.253 no óbitu 138.
Jornalista : Felicidade Ximenes
Editór : Florencio Miranda Ximenes
