DILI, 04 outubru 2022 (TATOLI) – Diretór Finansa no Patrimoniál, Ministériu Solidariedade Sosiál no Inkluzaun (MSSI), Jimmy dos Santos, hateten prosesu konstrusaun edifísiu MSSI iha Munisípiu Aileu, Ainaro, Viqueque atinje ona pursentu sanolu no Liquiçá sei iha faze dezeñu.
“Ami obliga hotu ona ninia orsamentu tanba edifísiu Aileu Ainaro ho Viqueque iha prosesu kontrusaun nia-laran no Liquiçsá mak sei iha faze dezeñu”, Jimmy haktuir ba Agência Tatoli, iha nia knaar fatin, Caicoli, ohin.
Totál orsamentu ne’ebé aloka ba edifísiu haat ne’e, Jimmy dehan MSSI aloka miliaun $1.7. Aileu nian aloka osan kuaze $413.000, Ainaro nian $500.000, Viqueque $500.600 no Liquiçá nian mak hamutuk $300.000.
“Neste momentu, ida ami foin selu ba projetu Aileu nian mak hamutuk $41.595, seluk seidauk relata sira-nia pedidu mai ami, hein katak iha trimestre ikus ne’e sira bele relata ona nune’e ita selu sira”, konklui.
Jornalista: Osória Marques
Editór : Zezito Silva
