Janeiru-setembru 2022 : IJT hatama ona reseita $4,245 ba kofre estadu
COVALIMA, 04 Outubro 2022 (TATOLI) – Inspesaun Jerál Traballu (IJT) hahu iha janeiru to’o setembro tinan 2022, hatama ona reseita $4,245 ba kofre estadu.
Liafuan ne’e hato’o hosi Inspetór Regionál Covalima, Gabriel Gusmão ba Tatoli,iha nia kna’ar fatin bairro Costa, Covalima, tersa ne’e.
Nia dehan, IJT hanesan Institutu públiku ne’ebé iha Ministériu Koordenadór Asuntus Ekonómiku nia okos ho nia papel atu kontrola kondisaun ba traballadór sira-nia saúde no kontrola mos traballadór estranjeiru sira, bazea ba lei traballo número 4/2012.
“Ami hatama reseita $4,245 ba kofre estadu ne’e sura husi fulan janeiru to’o juñu iha reseita $1.380. Parte seluk iha fali fulan jullu to’o setembru ami hatama reseita $2.865. Ho ida ne’e husi janeiru to’o setembru 2022, ami hatama reseita ho total hamutuk $4,245,” Gabriel Gusmão hateten.
Nia isplika, reseita ne’ebé IJT hatama ba kofre estadu ne’e mai hosi kompañia sira ne’ebé viola lei traballu hanesan kontrato traballu, lisensa anuál no violasaun over time ba trabaldór sira. Ho nune’e IJT foti medida aplika sasaun multa ba kompañia sira ne’e.
Tanba ne’e nia esplika, hahú janeiru to’o juñu IJT halo inspesaun ba kompañia 25, kompostu hosi kompañia lokál hitu (7) no internasionál 18.
Nune’e IJT hatama reseita ba kofre estadu mai hosi kompañia sira ne’ebé viola lei traballo iha kompañia neen (6) hosi númeru ne’e kompañia lokál-ida (1) no internasionál lima (5) ho total reseita $1.380.
Hahú fulan jullu to’o setembru IJT vizita kompañia 12 kompostu hosi kompañia lokál haat (4) no kompañia estranjeiru ualu (8).
“Kompañia ne’ebé viola kontratu traballu, over time no lisensa anuál ba trabaldór sira ami aplika ona multa ho total multa $2.865,” nia hateten.
Jornalista : Celestina Teles
Editóra : Armandina Moniz
