iklan

DILI, POLÍTIKA

Komisaun A sei fó apresiasaun alterasaun lei eleitorál ba PN

Komisaun A sei fó apresiasaun alterasaun lei eleitorál ba PN

Votante sira forma tuir liña molok ezerse sira nia deréitu vota ba elisaun prezidensiál segunda vola nian. Iha sentru votasaun eskola No 5 Comoro, tersa (19/04). Imajen dokumentasaun Tatoli/Antonio Daciparu

DILI, 04 outubru 2022 (TATOLI)-Meza Parlamentu Nasionál (PN), liuhosi reuniaun plenária tersa ne’e, anúnsiu admisaun no baixa ba komisaun A ne’ebé trata asuntu justisa no konstituisional ba proposta lei númeru 45/V(5a)-alterasaun dalimak lei eleitorál ba PN, hodi bele fó apresiasaun inisiál.

Prezidente Parlamentu Nasionál (PPN), Aniceto Longuinhos Guterres Lopes. Imajen TATOLI/Francisco Sony.

“Apresiasaun inisiál, relatóriu no pareser prazu loron 30”, Prezidente PN, Aniceto Longuinhos Guterres Lopes, anúnsiu iha sala plenária.

Governu liuhosi reuniaun Konsellu Ministru (KM), aprova ona proposta lei ne’ebé aprezenta hosi Ministru Administrasaun Estatál (MAE), Miguel Pereira de Carvalho, ba alterasaun dalimak lei númeru 6/2006, loron 28 dezembru, ne’ebé aprova lei eleitorál ba PN.

Notísia relevante: Membru Komisan A halo observasaun ba alterasaun lei eleitorál tolu

“Projetu ne’e hakarak atu introdús iha lei eleitorál ba Parlamentu Nasionál, inovasaun sira ne’ebé introdús ona iha tinan 2011 iha lei eleitorál ba Prezidente Repúblika, hodi mantein armonizasaun regra sira kona-ba prosesu eleitorál iha órgaun soberanu ne’e”, Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.

Inisiativa ne’e, inklui mós iha ho regra foun sira kona-ba oráriu funsionamentu sentru votasaun, lisensa ba jornalista iha servisu kobertura jornalístika eleisaun parlamentár nian, sira vota iha sentru votasaun ne’ebé besik liu iha sira-nia serbisu fatin, obrigatoriedade eleitór sira hodi identifika-aan bazeia ba dokumentu identifikasaun pesoál ne’ebé válidu, ka kriasaun figura monitór eleitorál ne’ebé ninia funsaun hanesan ho observadór eleitorál sira.

“Norma balun mós hadi’a hodi klarifika katak iha asembleia apuramentu nasionál, Komisaun Nasionál Eleisaun (CNE, sigla portugés) deside ho definitivamente kona-ba votu nulu sira, no elementu sira ne’ebé tau iha buletin votu inklui inkluzaun númeru orden hosi kada kandidatura, rezultadu hosi sorteiu lista kandidatura sira”, akresenta.

Aleinde ne’e, adota inovasaun prinsipál ida hosi eleisaun prezidensiál tinan 2021 mak hanesan sentru votasaun paralelu sira, maski ho forma foun, nune’e prevee atu instala sentru votasaun paralelu 13 iha Dili, ne’ebé ida-idak asosia ba munisípiu ida no ba Rejiaun Administrativa Espesiál Oekusi Ambenu (RAEOA).

Ministru Prezidénsia Konsellu Ministru, Fidelis Manuel Leite Magalhães. Imajen TATOLI/Egas Cristóvão

“Sidadaun eleitór sé de’it ne’ebé inskreve ona iha unidade resenseamentu fora hosi Dili, no ne’ebé la hakarak atu ba vota iha ninia sentru votasaun orijinál rasik, bele inskreve iha sentru votasaun paralelu sira ne’e”, portavós Governu hatutan.

Reuniaun plenária segunda ne’e, Prezidente PN mós anúnsiu admisaun no baixa ba komisaun A trata asuntu justisa no konstituisional ba proposta lei númeru 42/V(4a)-autorizasaun lejislativa iha matéira insolvénsia no rekuperasaun empreza, apresiasaun no pareser prazu loron 10. Kona-ba konteúdu no artigu hira hosi proposta lei seida’uk fó sai detallu tanba komisaun sei fó uluk apresiasaun inisiál.

Jornalista       : Nelson de Sousa

Editora           : Rita Almeida

iklan
iklan

Leave a Reply

iklan
error: Content is protected !!