iklan

NASIONÁL, HEADLINE, KAPITÁL

Labele harii uma iha fatin risku

Labele harii uma iha fatin risku

Traballadór sira halo hela kontrusaun barreira iha mota ulun Becora hodi proteje komunidadede nia uma ne’ebé hetan estragus hafoin inundasaun dia 4 abril 2021, Becora, tersa (27 setembru 2022). Imajen Tatoli/António Daciparu

DILI, 04 outubru 2022 (TATOLI)- Governu liuhosi Autoridade Munisípiu Dili (AMD) implementa ona lei (2003/ 2018) hodi hatun orientasaun ba estrutura iha suku no aldeia sira atu kontinua fó hanoin ba komunidade sira, liliu iha área risku, katak, labele hari uma ka konstrusaun ruma iha fatin sira ne’ebé AMD detekta ona risku.

“Ida ne’e, ita sempre hatun orden no agora dadaun ita hatun orden ba suku no aldeia sira atu kontinua fó hatene ba komunidade sira,” Adjuntu Prezidente Autoridade Munisípiu (PAM), Dili, António Moniz Clau informa ba Ajénsia Tatoli, iha nia knar fatin, Díli, segunda ne’e.

Kona-ba implementasaun lei 2003/2018 ne’e, Autoridade Munisípiu Dili halo rigór ba komunidade sira, nia informa, durante ne’e Autoridade Munisípiu Dili implementa lei ne’e ho rigór ba komunidade sira.

“Agora ita atu tuun ba sobu ita-nia komunidade sira-nia uma ne’e la’e, tanba ita só ba fó-hanoin no fanu sira-nia konsiénsia atu koidadu sira-nia aan iha momentu ne’ebé udan-boot no tama iha inundasaun. Maibé, ita atu ba obriga sira labele, ida ne’e ita hasoru problema,” nia dehan.

Tanba ne’e, komunidade sira ne’ebé la kumpri ba lei hodi hela nafatin iha fatin risku, AMD atu foti medida dahuluk haree ba kondisaun.

“Loloos, se Munisípiu Dili iha kondisaun ita ba foti sira, ita sobu no ita ba halo uma hodi hela, agora ita haruka sira ba muda de’it ita ba tau iha ne’ebé. Tanba ne’e, kondisaun ita-nia Sentru Alojamentu Hera nia objetivu atu ba ida ne’e, katak aban bainrua kuandu iha situasaun emerjénsia ruma ne’ebé ita presiza atu evakua sira iha situasaun ruma, ita evakua sira ba iha ne’ebá. Maibé, agora imi (jornalista ) haree katak ita iha hela faze identifikasaun iha terenu, nia prosesu sei la’o kleur,” autoridade ne’e hateten.

Fila ba fatin risku, Governu Sei la apoiu

Iha parte seluk, Adjuntu Prezidente Autoridade Munisípiu, Dili, António Moniz Clau, informa Governu, liuhosi Autoridade Munisípiu Dili (AMD), sei la fó apoiu ba vítima inundasaun sira ne’ebé hetan ona apoiu iha tinan kotuk hodi fila ba fatin risku.

Prezidente Interinu Autoridade Munisípiu Dili, António Moniz Calau entrega foos simbólikamente ba vítima inundasaun sira iha Sentru evakuasaun Dom Bosco Comoro, Dili, imajen Tatoli/ Arminda Fonseca

“Iha deklarasaun (ba vítima inundasaun sira iha tinan kotuk), iha Protesaun Sívil, mezmu sira la fó mai ami, maibé iha akordu ida entre vítima sira ho Protesaun Sívil katak, simu sasán la fila ba fatin risku, se bainhira fila ba risku aban bainrua kona fali (vítima) ita la responde ona apoiu ruma ba sira, ida ne’e iha akordu esplika iha ne’ebá,” António Moniz Clau haktuir.

Tuir nia, Autoridade Munisípiu Dili to’o oras ne’e, seidauk simu informasaun katak komunidade sira ne’ebé sai ona vítima ba dezastre naturál, fila-fali ba fatin risku.

“Tanba, bainhira sira hetan dezastre ita mobiliza sira ba fatin konsentrasaun ho Protesaun Sívil no kuandu ita tama ona ba situasaun normál ita lori fila ka ita fase materiál no halo deklarasaun katak, labele fila ba fatin risku, ida ne’e mak iha opsaun rua (2), katak ida ba Sentru Alojamentu Provizóriu no ida fila ba munisípiu orijen ne’ebé ita halo ona iha tinan kotuk,” nia esplika.

Nia salienta, vítima inundasaun iha tinan kotuk ne’ebé dadaun iha Sentru Alojamentu mak Sentru Formasaun Haburas iha Hera, ida ne’e AMD aluga ba tinan ida ho totál xefe familia purvolta 24.

“Maibé, ami rona katak na’in tolu (3), simu ona materiál hodi fila-fali ba sira-nia rai ne’ebé iha Dili laran atu halo uma. Ba sira ne’ebé la iha rai, sira mantein iha ne’ebá hodi hein Governu nia atendimentu. Nune’e, mós iha komunidade balun ne’ebé hela iha Eskola EBC Hera, ida ne’e Autoridade Munisípiu Dili nafatin aprosima sira buka rai, kuandu iha rai ruma ami koordena ho Protesaun Sivil fó apoiu materiál hodi halo uma, se la iha rai sira nafatin mantein hodi hein desizaun Governu,” Adjuntu PAM ne’e afirma.

Jornalista : Nelia Fernandes
Editór       : Rafy Belo

iklan
iklan

Leave a Reply

iklan
error: Content is protected !!