MOP sei halo levantamentu dadus abitasaun iha Covalima
COVALIMA 04 Outubro 2022 (TATOLI) – Ministériu Obras Públika (MOP) liuhosi Diresaun Nasionál Abitasaun (DNH) sei halo levantamentu dadus abitasaun eransa hosi tempu Portugés no Indonesia nian iha munisípiu Covalima.
Diretora Nasionál Abitasaun , Lolita da Silva Amarál dehan abitasaun mak hanesan nu’udar komponente importante iha parte urbana no rejionál ne’ebé kompleta ho fasilidade prinsipal no fasilidade komplementar sira ne’ebé estabelese hodi fo apoiu ba aktividade ema ni’an.
“Ohin ita halo enkontru ho autoridade sira iha Covalima hodi fahe informasaun konaba atu halo levantamentu dadus abitasaun eransa tempu portugés no Indonesia iha munisipiu Covalima”, Diretora Lolita hato’o ba jornalista sira, iha salaun Administrador Munisipíu Covalima (AMC), Sukaer-Laran, tersa ne’e.
Nia isplika, objetivu levantamentu dadus ba uma eransa tempu Portugés no tempu Indonesia, atu sai hanesan base de dadus ba Diresaun Nasional Habitasaun (DNH), atu iha futuru Governu iha planu hodi halo reabilitasaun no reajustamentu ba abitasaun eransa sira-ne’e.
Alvu hosi estudu ne’e identifika kondisaun fisiku ba abitasaun (fizikamente), identifika fasilidade infranstrutura baziku ba abitasaun, Identifika sosio ekonomia no identifika kondisaun ambiénte.
Nia hatutan, abitasaun ne’ebé okupasaun Indonesia no Portugés hela la’os uma-ida de’it maibé kompostu hosi uma lubuk hanesan parte integradu hosi kesi komunidade kompleta ho falidade sira hanesan asesu ona ba estrada ka la’e, bee mos, eletrisidade, sentru saúde ,eskola ,merkadu , loja no kapela.
“Ita liga abitasaun eransa Indonesia no Portugés iha ka lae. Ida ne’e papel tekniku abitasaun atu halo levantamentu hodi bele kria baze dadus atu haree iha futuru instalasaun abitasaun ho modelu oinsa,“ nia informa.
Hosi levantamentu ne’e, tékniku sira atu buka hatene , kondisaun fizíka uma ne’e oinsa di’ak ka la’e, iha ona mudansa no dezenvolve ona ka lae , tipu no modelu karik iha problema infranstrutura baziku ne’ebé seidauk instala ka instala ona.
Ho nune’e tékniku hosi Diresaun Nasional abitasaun na’in-12 sei halo levantamentu dadus ba abitasaun eransa tempu Portugés no Indonesia durante semana rua hahú iha loron kuarta, 5 outubru 2022 to’o remata .
Tuir Konstituisaun RDTL artigo 58 hateten, ema hotu iha direitu ba sira-nia família atu iha uma/abitasaun ida ho dimensaun adekuada ho kondisaun ijiene, atu bele rai didi’ak ida-idak nia itimidade no família nia privasidade.
Ho Diploma Ministerial No. 18/MOP/2021, 14 de Abril, kna’ar no funsaun DNH , iha artigo 5 hala’o Kordenasaun no evaluasaun konaba Polítika ezekusaun abitasaun Nasional Planeamentu Urbanu, Promove Elaborasaun no ezekusaun Polítika abitasaun Nasional.
Administradór Munisípiu Covalima, Francisco de Andrade husu ba administradór administrativu sira, atu halo kolaborasaun di’ak ho Diresaun Nasional Abitasaun wainhira halo lavantamentu dadus , la’os iha urbana de’it, maibé ba to’o iha suku no aldeia sira atu nune’e bele hetan rezultadu ne’ebé di’ak.
“Antes atu halo lavantamentu dadus ohin ita halo ona diskusaun nune’e wainhira tun ba tereñu halo levantamentu dadus hodi hetan rezultadu ne’ebé pozitivu,” nia hateten.
Jornalista : Celestina Teles
Editóra : Armandina Moniz
