iklan

HEADLINE, MUNISÍPIU, OÉ-CUSSE (RAEOA), POLÍTIKA

Selebra loron mundiál feto, PITL hili feto neen asume kargu lideransa iha RAEOA

Selebra loron mundiál feto, PITL hili feto neen asume kargu lideransa iha RAEOA

Romana Kolo Batan, asume kargu lideransa nu’udar Sekretária Rejionál Agrikultura iha RAEOA. Imajen Tatoli/ Abílio Elo Nini.

OÉ-CUSSE, 04 outubru 2022 (TATOLI) – Plan International Timor-Leste (PITL) hili labarik feto na’in-neen asume kargu lideransa iha Autoridade Rejiaun Administrativa Espesiál Oé-Cusse Ambeno (RAEOA) durante loron ida, hahú tuku 8h00 to’o 17h00 hodi selebra loron mundiál feto ne’ebé sei akontese iha loron 11 outubru.

Feto na’in-neen ne’e maka hanesan, Felicidade da Silva Mendonça Neno tinan 12 hosi eskola CÁFE, asumi kargu nu’udar Adjuta Prezidente Autoridade RAEOA ba Asuntu Sosiál, Romana Kolobatan tinan 10 hosi Eskola Santo António Oé-Cusse asumi kargu hanesan Sekretáriu Rejionál ba Asuntu Agrikultura.

Carla Salu hosi eskola CAFE asumi kargu hanesan Sekretáriu Rejionál ba Asuntu Terra no Propriedade, Maria Anin hosi eskola EBC Santo António Oé-Cusse, asumi kargu nu’udar Sekretáriu Rejionál ba Asuntu Komérsiu.

Nune’e mós Imaculada da Costa hosi eskola EBC Santo António, asume kargu hanesan Sekretáriu Rejionál ba Asuntu Sáude, no Zenizia Maniquim hosi eskola EBC Santo António Oé-Cusse, asumi kargu lideransa hanesan Sekretáriu Rejionál ba Asuntu Administrasaun.

Prezidente Komisaun Organizadora Plan International, Belchior Gonçalves, hatete, molok implementa, Plan serbisu hamutuk ho Autoridade RAEOA realiza plenária atu fó lejitimidade ba joven sira iha Oé-Cusse, atubele foti pozisaun iha kada Sekretáriu Rejionál nu’udar kargu lideransa durante loron ida.

“Atividade ne’e hodi komemora loron mundiál ba labarik feto ne’ebé sei akontese iha loron 11 outubru, tanba tinan ne’e Plan selebra ba dala 10 ona iha Timor-Leste, no realiza iha munisípiu tolu mak hanesan, Oé-Cusse, Covalima, Baukau no Dili, ho totál feto foti pozisaun hamutuk 58 no iha RAEOA, feto na’in-neen mak asume kargu lideransa iha Autoridade RAEOA,” Belchior Gonçalves, informa ba jornalista sira hofoin enkontru ho autoridade RAEOA iha Oé-Cusse, tersa ne’e.

Tuir nia, ajenda ne’ebé sei hala’o durante asumi kargu lideransa ne’e, sei serbisu hamutuk ho kada Sekretáriu Rejionál no Adjuntu Prezidente Autoridade, no realiza enkontru ho ekipa hala’o vizita ba fatin serbisu no audiénsia entre ekipa diresaun idak-idak.

Prezidente Autoridade RAEOA, Arsénio Paixão Bano, orgullu ba programa ne’e, hanesan jestu ida atu promove lideransa labarik ba future, liuliu feto,

“Entaun ohin Sekretáriu Rejionál no Adjuntu ida husik sira-nia pozisaun durante loron ida, entrega ba feto sira atu asumi nia posizaun hodi serbisu hamutuk ho ita iha loron ida-ne’e, tán ne’e ha’u espera liuhosi oportunidade ne’e, joven feto sira sei aprende buat barak sai hanesan esperiénsia ba futuru oinsá bele sai lideransa di’ak iha rejiaun ne’e,” nia orgullu.

Nia afirma, Timor-Leste tenke tau importánsia ba loron mundiál labarik feto, loron ba konsensializasaun ne’e importante.

Felicidade da Silva Mendonça Neno, asumi kargu lideránsa hanesan Adjunta Prezidente Autoridade RAEOA ba Asuntu Sosiál, orgullu no agradese ba Plan International tanba implementa programa ne’e hodi motiva feto sira bele foti pozisaun.

“Nu’udar feto foinsa’e ha’u orgullu ba programa ida-ne’e, ha’u agradese ba Plan International tanba primeia promove ami atu foti pozisaun hanesan ne’e iha Autoridade RAEOA, ami kontente ho programa ne’e, nune’e motiva nafatin ami katak feto mós bele, la’ós mane de’it maibé ami mós bele foti pozisaun iha kontrusaun Estadu Timor-Leste,” nia katak.

Jonalista: Abílio Elo Nini
Editór: Evaristo Soares Martins

iklan
iklan

One Comment

Leave a Reply

iklan
error: Content is protected !!