DILI, 04 outubru 2022 (TATOLI)—Sekretaria Estadu Formasaun Profisionál no Empregu (SEFOPE) liuhosi Diresaun Nasionál Empregu Exteriór (DNEE), tersa ne’e, despede tan traballadór timor-oan 295 hodi bá serbisu iha Austrália, iha fulan-outubru nia laran.
Diretór Jerál SEFOPE, Paulo Alves, hateten, atividade despede ho traballadór sira ne’e hodi parte traballadór, família no Governu asina deklarasaun ida nune’e traballadór sira bá serbisu tuir regulamentu sira ne’ebé iha.
“Ita-nia traballadór 295 sei bá serbisu iha Austrália ho empreza hamutuk 16. Traballadór sira balun tuan sei aranka iha tempu badak, konta semana ida-ne’e nia-laran,” Diretór Jerál hateten iha salaun INFORDEPE, Balide.
Notísia relevante: Traballadór Austrália-Korea Sul Hatama ona Osan U$25,693,096.48
Nia dehan, traballadór timor-oan ne’ebé konsege bá serbisu ona iha Austrália hahú hosi inísiu to’o agora hamutuk 6.000, maibé ba tinan ne’e, hahú hosi janeiru to’o outubru Governu haruka ona traballadór 2.000 resin.
Iha fatin hanesan, Traballadór, Regina Magno Soares, sente kontente bele hetan oportunidade bá serbisu iha Austrália.
“Ha’u sente kontente hetan oportunidade bá serbisu iha Austrália iha empreza Petane, nu’udar traballadór sei serbisu tuir regulamentu ne’ebé iha. Ha’u-nia kontratu durante tinan-tolu,” nia tenik.
Traballadór sira sei bá serbisu iha empreza 16 hanesan Connect Group/ADCO, SW Labour Solution, Advance Packing,Tasmania Berries, Burlington Berries, Deep Creek Organics, FPG Group Frutico WA, Sunray Strawberries, Burlington Berries, McCrystal agricultural services, Connect Group/Flowers, Connect Group/Niceforo, Hillwood berries, Tasmania Berries, Hillwood berries no Petane.
Jornalista : Arminda Fonseca
Editora : Julia Chatarina
