DILI, 04 outubru 2022 (TATOLI) – Diretór Finansa no Patrimoniál, Ministériu Solidariedade Sosiál no Inkluzaun (MSSI), Jimmy dos Santos, hateten ministériu ezekuta ona Orsamentu Jerál Estadu (OJE) 2022 iha trimestre datoluk ho pursentu 17,9.
“Ita foin mak atinje ezekusaun OJE ba trimestre datoluk ho pursentu 17,9, tanba ita hetan fali alokasaun foun ida kona-ba subsídiu $200 fim do ano nian, entaun MSSI nia pursentu ezekusaun tuun no nia orsamentu ne’ebé aumenta, konserteza pursentu tenke tuun ho pursentu 17,9″, Jimmy dehan ba Ajénsia Tatoli, iha nia knaar fatin Caicoli, tersa ne’e.
Maibé kona-ba saláriu no vensimentu ministériu ezekuta ona pursentu 69,1 ho nia osan $1,328,441,77 no saldo hela $594,458,23 hosi totál osan ne’ebé prevé hamutuk $1,922,900. Bens no servisu 36,3% ho nia osan $2,121,691,16 no saldo hela $4,043,749,23 hosi totál osan prevé $7,250,009.
Nia esplika tan kapitál menór seidauk ezekuta maibé nia osan prevé hamutuk $642,793. Kapitál dezenvolvimentu atinje 82.5% ho nia osan $41,595,56 no saldo laiha ona maibé halo hotu obligasaun hein pedidu atu selu. Depois transferénsia públiku nian mak 13.7% ho nia osan $5.539.050.63 no saldo hela $67.864.603 hosi $79.758.713.
Kona-ba programa MSSI nian kontinua la’o hela hanesan boa governasaun no jestaun instituisionál inklui ho inkluzaun sosiál.
Jornalista: Osória Marques
Editór : Zezito Silva
