Udan no anin bo’ot fó amaesa ba edifísiu IJT
COVALIMA, 04 outubru 2022 (TATOLI)–Udan no anin bo’ot fó ameasa ba edifísiu Inspesaun Jerál Traballu (IJT), liu-liu ba funsionáriu sira atu hala’o servisu, tanba oras ne’e didin lolon edifísiu komesa nakfera.
“Liga ba kondisaun edifisiu ita-bo’ot sira haree rasik, tuir loloos uma ne’e la kondis ita atu uza hodi halo servisu. Tanba, edifísiu ne’e fó ameasa bo’ot ba funsionáriu iha tempu udan no anin edifísiu bele monu”, Inspetór Rejionál Covalima, Gabriel Gusmão, ba jornalista sira iha Bairru Costa Covalima, tersa ne’e.
Ho problema ne’ebé inspetór ho nia funsionáriu sira enfrenta, nia parte mós haruka ona proposta ba ministériu kompetente, maibé to’o ohin loron seidauk iha resposta.
“Ami mós haruka ona proposta ba nasionál atu halo re-abilitasaun edifísiu ida ne’e, maibé to’o agora seidauk iha resposta. Ha’u la hatene tanba orsamentu mak la to’o ka oinsá nia prosesu agora iha Dili”, nia dehan.
Kondisaun edifísiu ladun di’ak sira mós hasoru difikuldade menus fasilidade hanesan transporte ne’ebe dikulta funsionáriu sira atu kontrola kompañia sira iha postu administrativu nia laran.
“Maske ami hasoru difikuldade, menus fasilidade hanesan komputadór, no transporte. Tanba ami iha de’it motorizada rua ne’ebé kondisaun ladun di’ak bainhira atu halo viajen ba postu administrativu sira. Maibé difikuldade ida ne’e la hamate ami-nia ispíritu atu hala’o servisu no ami kontinua nafatin esforsu hodi hala’o servisu”, nia tenik.
Funsionáriu ne’ebé servisu iha IJT, I.P mak hanesan, inspetór traballu rejionál ajuda mós hosi inspetór traballu estajiadu na’in-ida, funsionáriu kontratu ida ne’ebé ajuda iha téknika administrasaun no na’in-ida servisu hanesan seguransa.
Jornalista : Celestina Teles
Editora : Armandina Moniz
