DILI, 04 outubru 2022 (TATOLI)-Uniaun Inter Parlamentár (UIP) ho Parlamentu Nasionál (PN) Timor-Leste, destaka importánsia formasaun rekursu umanu no envolvimentu PN iha semináriu inter-rejional ho parlamentu sira seluk.
Prezidente UIP, Duarte Pacheco, hateten UIP hakarak pretende kooperasaun ho PN Timor-Leste iha futuru.
“Ohin, vizita mai iha ne’e, halo mós enkontru ho Prezidente Parlamentu Nasionál no Xefe Bankada hodi aborda lasu kooperasaun entre UIP ho Parlamentu TL iha futuru”, Prezidente UIP ba jornalista sira hafoin intervensaun iha reuniaun plenária.
Duarte Pacheco hatutan hasoru malu ho direjente sira iha PN ko’alia objetivu rua. “Posivel UIP apoiu liuhosi formasaun rekursu umanu no téknika lejislativa ba funsionáriu no deputadu sira iha janeiru tinan oin”, nia esplika.
Tuir nia, UIP bele apoiu tanba iha esperénsia jere informasaun ba parlamentu iha mundu hamutuk 170 prátika programa lubun.
Nia hatutan tan, oinsá haree envolvimentu PN iha semináriu inter-rejional. “Ba ha’u iha inisitiva ida hosi UIP ho karáter rejional la’ós destina de’it ba Parlamentu Timor maibé ba Parlamentu hotu iha rejiaun Ázia Pasífika hodi konvida, troka esperensia ba problema komun hanesan alterasaun klimátika, esplorasaun traballu infantíl, violénsia hasoru feto”.
Nune’e, UIP disponivel no hein vontade PN TL hodi realiza programa ne’e hafoin eleisaun lejislativa.
Notísia relevante: Parlamentu Timor-Leste hametin diplomasia parlamentár ho IPU
Prezidente PN, Aniceto Guterres, hateten sente onra ida ba vizita ne’e. “Espresa gratidaun apoiu UIP no Asembleia Repúblika ba ami nia instituisaun durante tinan 20 no kontinua nafatin servisu hamutuk, reforsa lasu kooperasaun ba fortalesimentu Parlamentu Nasionál no afirmasaun UIP”.
Prezidente PN ne’e, kongratula Prezidente UIP ba servisu di’ak ne’ebé sempre prioritiza UIP iha oin.
Jornalista : Nelson de Sousa
Editora : Rita Almeida
