DILI 05 outubru 2022 (TATOLI) – Programa Nasionál Dezenvolvimentu Suku (PNDS) hahú konstrui ona Uma Kbiit laek (UKL) hamutuk 3.700 no falta 300 tanba PNDS mós iha atividade reabilitasaun eskola, sede suku, estrada rural no dada bee ba komunidade nia fatin.
“Ba tinan ne’e, ita hahú konstrui ona uma 3.700 hosi totál uma 4.000”, Diretora Sekretariadu Tékniku Programa Nasionál Dezenvolvimentu Suku (PNDS), Claudinha Soares Pinto, haktuir ba Ajénsia Tatoli, iha resintu Ministériu Adminitrasaun Estatál (MAE), ohin.
Responsável salienta falta de’it uma ho totál 300 mak seidauk konstrui tanba PNDS mós iha programa barak, hanesan reabilitasaun eskola, sede suku, estrada rural no dada bee ba komunidade, maske nune’e, tempu badak sei implementa hotu totalidade uma ne’ebé seidauk hahú.
Entretantu, uma hirak ne’ebé seidauk konstrui lokaliza iha Rejiaun Administrativa Espesiál Oé-Cusse Ambeno (RAEOA) ho munisípiu ida tan.
“Hela RAEOA mak seidauk implementa tanba mudansa interna no munisípiu ida tan maibé ha’u la lembra”, konklui.
Rekorda katak Governu liuhosi Ministériu Finansa aloka orsamentu besik millaun $8 atu kontinua programa refere maibé ida-ne’e la to’o atu hala’o iha suku hothotu tanba redusaun pursentu 75 hosi orsamentu ne’ebé aloka iha tinan ida-ne’e.
Nune’e, deputadu sira propoin tan osan hamutuk $63,600.000 hodi MAE liuhosi PNDS bele implementa Uma Kbiit La’ek iha 2022, atu aumenta uma 10 kada suku nune’e, Governu prontu atu implementa programa ida ne’e.
Jornalista: Osória Marques
Editór: Zezito Silva
